डोंबिवली - कल्याण लोकसभा मतदार संघातील कल्याण पूर्व विधानसभा मतदार संघाच्या एसएसटी पथकाने मंगळवारी 7 लाखाची संशयास्पद रोख रक्कम जप्त केली आहे. कल्याण पूर्वेत नागरिकांच्या तपासणी दरम्यान ही रक्कम आढळून आली आहे.

कल्याण पूर्व रेल्वे स्थानक येथे एसएसटी पथकातील कर्मचारी प्रवासी ब्रीजवरील टिकीट कांऊटरजवळ प्रवाशांच्या सामानाची तपासणी करीत होते. यावेळी कोळसेवाडी येथे राहणारे जयेश पोटे यांचेकडे असलेल्या बॅगेबाबत तपासणी केली. त्यावेळी बॅगेमध्ये रोख रक्कम असल्याचे संबंधितानी सांगितले. परंतू, सदर रोख रक्कमेबाबत संबंधितांनी सविस्तर उत्तर दिले नाही.

तसेच रक्कमेच्या पुराव्याबाबत काहीही कागदपत्रे सादर केली नाहीत. त्यामुळे सदरची रक्कम रुपये 7 लाख पंचनामा करून, जप्त करुन कल्याण लोहमार्ग पोलीस स्टेशन, कल्याण (पश्चिम) येथे पोलीस ठाण्याच्या पितळी सीलने पेटीमध्ये स्वाक्षरी करुन सीलबंद केले. अशी माहिती 142 कल्याण पूर्व विधानसभा मतदार संघाचे एसएसटी पथकाचे स्थिर सर्व्हेक्षण पथक पथकप्रमुख दिपेश राठोड यांनी दिली आहे.