उल्हासनगर: शहरात लॉजिंग-बोर्डिंगचे जाळे पसरले असतानाच,आता उल्हासनगरात चक्क एका इमारतीत कोचिंग क्लासेसच्या वर लॉजिंग-बोर्डिंगचा धंदा सुरू करण्यात आल्याचा धक्कादायक प्रकार उघडकीस आला आहे.त्यामुळे विशेषतः कोचिंग क्लासेसमध्ये येणाऱ्या विद्यार्थिनीत भीतीचे सावट पसरले असून पालकांत संतापाची लाट पसरली आहे.

मुख्यमंत्री एकनाथ शिंदे यांच्या शिवसेना प्रणित युवासेना कल्याण लोकसभा सचिव हरजिंदरसिंग(विक्की)भुल्लर,शिवसेना विभागप्रमुख प्रमोद पांडे यांनी हा प्रकार उघडकीस आणला आहे. विद्यार्थिनींना या सावटातून बाहेर काढण्यासाठी पोलिसांनी पुढाकार घेऊन हे लॉजिंग-बोर्डिंग बंद केले नाही तर शिवसेना स्टाईलने लॉजिंग-बोर्डिंग बंद करू असा ईशारा दिला आहे.

कॅम्प नंबर 1 मधील शहाड परिसरात अनेक वर्षांपासून एका इमारतीच्या पायथ्याशी चाणक्य कोचिंग क्लासेस सुरू आहे.याठिकाणी तळागाळातील नववी ते बारावीचे विद्यार्थी क्लासेससाठी येतात.त्यांच्याकडून माफक फी आकारण्यात येते.

मात्र अलीकडेच क्लासेसच्या वरच्या मजल्यावर ग्रेस नावाच्या लॉजिंग-बोर्डिंगचा धंदा सुरु करण्यात आला आहे.त्यामुळे या ठिकाणी असामाजिक तत्त्वांचा मोठ्या प्रमाणात वावर वाढलेला आहे.या परिस्थितीत जर अनुचित प्रकार घडल्यास त्यास जबाबदार कोण?असा सवाल,विक्की भुल्लर,प्रमोद पांडे यांनी उपस्थित केला आहे.

या ग्रेस लॉजिंग-बोर्डिंगमुळे क्लासेसमध्ये येणाऱ्या विद्यार्थिनीत भीतीचे वातावरण निर्माण झाले असून पालक वर्गातही संताप व्यक्त केला जात आहे.तसेच स्थानिक नागरिकांचाही विरोध आहे.त्यामुळे पोलिसांनी ग्रेस लॉजिंग-बोर्डिंग बंद करून विद्यार्थिनींना,पालकांना,स्थानिक नागरिकांना मोकळा श्वास द्यावा अशी आमची मागणी आहे.

अन्यथा रस्त्यावर उतरून शिवसेना स्टाईलने लॉजिंग-बोर्डिंगला बंद करण्यासाठी आंदोलनाचा पावित्रा हाती घेतला जाणार असा इशारा विक्की भुल्लर,प्रमोद पांडे यांनी दिला आहे.