पोलादपूर (बातमीदार) : पोलादपूरमध्ये तालुक्‍यातील लोहारमाळ येथे एका ढाब्याजवळ थांबलेल्या कंटेनरला भरधाव स्कुटीची शनिवारी दुपारी २ वाजता धडक बसली. या अपघातात खडपी येथील दोघे भाऊ गंभीर जखमी झाले होते. त्यापैकी एकाचा उपचारादरम्यान मृत्यू झाला आहे.

पोलादपूर तालुक्‍यातील खडपी गावातील अमित रघुनाथ शिंदे (वय २५) व गणेश रघुनाथ शिंदे (वय ३३) हे कामानिमित्त महाड येथे आले होते. काम आटोपून पुन्हा खडपी गावी मुंबई-गोवा महामार्गावरून परतत असताना लोहारमाळजवळील भरपूरसिंग ढाब्याजवळ आले असता तेथे थांबलेल्या कंटेनरला त्यांच्या दुचाकीची मागून धडक बसली. ही धडक कंटेनरच्या लोखंडी गर्डरला बसल्याने दुचाकीवरील अमित व गणेश हे दोघे भाऊ जखमी झाले. अपघातानंतर ग्रामीण रुग्णालयात उपचारासाठी त्यांना दाखल करण्यात आले. अमित गंभीर जखमी असल्याने त्याला महाड येथे हलवण्यात आले होते; मात्र उपचारादरम्यान त्याचा मृत्यू झाला. या अपघातप्रकरणी पोलादपूर पोलिस ठाण्यात नोंद करण्यात आली आहे.