डोंबिवली - कल्याण - कसारा रेल्वे मार्गावरील शहाड ते आंबिवली दरम्यान रेल्वे रुळावर एक 46 वर्षीय महिला मृतावस्थेत कल्याण लोहमार्ग पोलिसांना आढळून आली होती. कल्याण लोहमार्ग पोलीस ठाण्यात याप्रकरणी अकस्मात मृत्यूची नोंद करण्यात आली आहे. सदर महिलेजवळ एक तकारीची प्रत पोलिसांना आढळून आली आहे.

यामध्ये चार दिवसांपूर्वीच या महिलेने उल्हासनगर पोलीस ठाण्यात ती राहत असलेल्या परिसरातील सावकाराकडून छळ होत असल्याची तक्रार दाखल केली असल्याची बाब यामुळे उघडकीस आली आहे.

कल्याण रेल्वे पोलिसांना गुरुवारी रात्री 8.30 च्या सुमारास आंबिवली आणि शहाड स्थानकादरम्यान मालगाडीने एका महिलेला धडक दिल्याचा फोन आला. या घटनेची माहिती मिळताच रेल्वे पोलीस पथक घटनास्थळी दाखल होऊन पंचनामा करत मृतदेह उत्तरणीय तपासणीसाठी शासकीय रुग्णालयात पाठविला.

खळबळ जनक बाब म्हणजे मृत महिलेच्याजवळ पोलिसांना दिलेली तक्रारीची प्रत सापडली. ही महिला शहाड येथील रहिवासी असून तिला दोन मुलबआहेत. तिचा पती कपड्याच्या दुकानात काम करतात.

या घटनेचा तपास पीआय अर्चना दुसाने या करत असून त्या म्हणाल्या, "मालगाडीच्या धडकेत महिलेचा जागीच मृत्यू झाला आहे. मृत महिलेने चार दिवसांपूर्वी उल्हासनगर पोलिस ठाण्यात सावकार कडून छळ केला जात असल्याची तक्रार दाखल केली होती. यामध्ये एका सावकाराकडून दोन वर्षांपूर्वी लाखो रुपये कर्ज घेतले होते.

ते कर्ज फेडण्यासाठी सावकार छळ केल्याची तक्रार नोंदवली होती. महिलेचा मृत्यू झाल्यावर त्या तक्रारीची प्रत रेल्वे पोलिसांना मिळाली आहे. मात्र मृताच्या कुटुंबीयांनी कोणाच्याही विरोधात तक्रार न केल्यामुळे आम्ही अपघाती मृत्यूची नोंद कल्याण लोहमार्ग पोलीस ठाण्यात केली असल्याचे त्यांनी सांगितले.