ठकठक टोळीच्या दोन रेकॉर्डवरील आरोपींना अटक
६० हून अधिक गुन्ह्यांची उकल; २१ मोबाईल हस्तगत
अंधेरी, ता. ८ (बातमीदार) ः ठकठक टोळीच्या दोन रेकॉर्डवरील आरोपींना मालाड पोलिसांनी अटक केली. फईम शमीम शेख आणि मोहम्मद फईम अलमुद्दीन खान ऊर्फ बिल्ला अशी दोघांची नावे आहेत. त्यांच्या अटकेने ६० हून अधिक गुन्ह्यांची उकल झाली असून २१ चोरीचे मोबाईल पोलिसांनी जप्त केल्याचे वरिष्ठ पोलिस निरीक्षक रवींद्र अडाणे यांनी सांगितले.
मार्च महिन्यात एका व्यक्तीशी त्याच्या कारने अपघात केल्याचा आरोप करून दोघांनी वाद घालण्याचा प्रयत्न केला. याच दरम्यान एकाने त्याच्या कारमधील महागडा आयफोन चोरी करून पलायन केले होते. याप्रकरणी मालाड पोलिसांत मोबाईल चोरीचा गुन्हा नोंद होताच पोलिसांनी आरोपींचा शोध सुरू केला होता. सीसी टीव्ही फुटेज आणि तांत्रिक माहितीवरून पोलिसांनी मालाड येथून मोहम्मद फईम आणि फईम शेख या दोघांना ताब्यात घेतले. चौकशीत ते दोघेही ठकठक टोळीचे सदस्य असून त्यांनी मुंबईसह ठाणे ग्रामीण, दिल्ली, बंगलोर शहरात अशाच प्रकारे अनेक गुन्हे केल्याचे उघडकीस आले. त्यांच्या चौकशीतून अशाच इतर काही गुन्ह्यांची उकल होण्याची शक्यता वरिष्ठ पोलिस निरीक्षक रवींद्र अडाणे यांनी वर्तविली आहे.

कारमधील मौल्‍यवान वस्‍तूंची चोरी
वाहनांच्या काचांवर ठकठक करून, कारचालकांचे लक्ष विचलित करून कारमधील मोबाईलसह इतर मौल्यवान वस्तू चोरी करणारे हे सराईत गुन्हेगार आहेत. अटकेनंतर या दोघांनाही बोरिवलीतील स्थानिक न्यायालयाने शुक्रवारपर्यंत पोलिस कोठडी सुनावली आहे.