मुंबई - घाटकोपर पूर्व परिसरात पूर्ववैमनस्यातून एका व्यक्तीने गॅस सिलिंडरचा स्फोट करून सर्व रहिवाशांना जाळून जीवे मारण्याची धमकी दिल्याचा प्रकार समोर आला आहे. या घटनेची माहिती मिळाल्यानंतर घटनास्थळी पोहोचून पंतनगर पोलिसांनी आरोपीला ताब्यात घेण्याचा प्रयत्न करू लागले.

अर्धातास चाललेल्या थरारानंतर अखेर पोलिसांनी आरोपी विनोद शर्माला अटक केली. आरोपीविरोधात यापूर्वी मारहाणीचे 4 गुन्हे दाखल आहेत. त्यापैकी 2 गुन्हे पंतनगर पोलीस ठाणे, तसेच पार्कसाईट पोलीस ठाणे आणि टिळक नगर पोलीस ठाण्यात प्रत्येकी एक गुन्हा दाखल आहे.

घाटकोपर पूर्व परिसरातील रहिवासी वस्तीत राहणाऱ्या आरोपी विनोद शर्माचे तेथील काही रहिवाशांबरोबर पूर्वीपासून वाद होते. गुरूवारी काही कारणाने विनोदचा स्थानिक रहिवाशांशी वाद झाला. आरोपीने स्थानिक नागरिकांना शिवीगाळ केली.

तसेच त्यांना धमकावण्यासाठी घरातून गॅस सिलिंडर घेऊन आला. आरोपी विनोद गॅस सिलिंडरचा स्फोट करून रहिवाशांना जाळून ठार मारण्याची धमकी देऊ लागला. त्यामुळे स्थानिकांमध्ये भीतीचे वातावरण निर्माण झाले.

स्थानिक रहिवाशांमार्फत घटनेची माहिती मिळताच पंतनगर पोलीस ठाण्याचे पथक घटनास्थळी पोहोचले. पोलिसांनी सुरुवातीला विनोदला गोड बोलून समजवण्याचा प्रयत्न केला. पण तो पोलिसाना बधत नव्हता. आरोपीला परावृत्त करण्याचा प्रयत्न केला असता त्याने पोलिसांनाही धक्काबुक्की करून मारहाण केली.

इतर पोलिसांनी अखेर शर्थीचे प्रयत्न करून ताब्यात घेतले. त्यानंतर गुरूवारी आरोपी विनोद शर्मा विरोधात गुन्हा दाखल करून तात्काळ त्याला अटक करण्यात आली.