Aditya Thackeray: महानगरपालिका प्रशासनामार्फत रस्ते सुधारणांसाठी रस्त्यांचे सिमेंट कॉंक्रीटीकरण प्रकल्प हाती घेण्यात आला आहे. या रस्ते कामांबाबत शिवसेना ठाकरे गटाचे नेते आदित्य ठाकरे यांनी गंभीर आरोप केले आहेत. हे सर्व आरोप निराधार आणि वस्तुस्थितीशी विसंगत असून त्यामध्ये कोणतेही तथ्य नाही; असा दावा पालिका प्रशासनाने केला आहे.

महापालिकेद्वारा ३९७ किलोमीटर अंतराच्या एकूण ९१० रस्त्यांचे काँक्रीटीकरणाकरिता जानेवारी २०२३ मध्ये कंत्राटदारांना कार्यादेश देण्यात आले असून सदर कामे पाच मोठ्या कंत्राटदारांमार्फत प्रगतिपथावर आहेत.

येथे सुरू आहेत कामे

१ पश्चिम उपनगरात एकूण ९६ ठिकाणी कामे सुरू आहेत. त्यातील ८३ ठिकाणी पर्जन्य जलवाहिनीची कामे प्रगतिपथावर आहेत व १३ ठिकाणी वाहतूक मार्गाकरिता खोदकाम प्रगतिपथावर आहे. लवकरात लवकर काँक्रीटीकरण करण्यात येईल.

२ पूर्व उपनगरात एकूण २७ ठिकाणी कामे सुरू आहेत. त्यातील १९ ठिकाणी पर्जन्य जलवाहिनीची कामे प्रगतिपथावर आहेत. ८ ठिकाणी वाहतूक मार्गाकरीता खोदकाम प्रगतिपथावर असून लवकरात लवकर काँक्रीटीकरण करण्यात येईल.

३ शहर विभागातील कामे रखडली असून तेथील कंत्राटदाराला नोटीस बजावण्यात आली असून कायदेशीर प्रक्रिया सुरू आहे. तिथेही लवकरच काम सुरू करण्यात येईल.

काय आहे प्रशासनाचे म्‍हणणे?

मुंबईकरांच्या दर्जेदार रस्ते निर्मितीसाठी पालिकेने सातत्याने या प्रकल्पासाठीचा पाठपुरावा केला आहे. या कॉंक्रीट रस्त्यांमुळे मुंबईतील नागरिकांना खड्डेमुक्त रस्ते उपलब्ध करून देण्यात येणार आहेत. यंदा पावसाळ्यातदेखील प्रकल्प रस्त्यांवरील खड्डे बुजवून नागरिकांना वाहतुकीचा त्रास होणार नाही, या दृष्टीने खबरदारी घेत देखभालही केली आहे. त्यामुळे सिमेंट कॉंक्रीट रस्त्यांच्या निमित्ताने करण्यात आलेले आरोप हे वस्तुस्थितीला अनुसरून नाही, असा खुलासा पालिका प्रशासनाने केला आहे.