मुंबई - राष्ट्रवादी काँग्रेसचे अध्यक्ष शरद पवार (Sharad Pawar) यांच्या सिल्व्‍हर ओक बंगल्यावर (Bunglow) चपला, दगड फेकल्यानंतर महिला कर्मचाऱ्यांनी (Women Employee) आक्रोश करून बांगड्याही फोडल्या. या घटनेनंतर एसटी कर्मचाऱ्यांची (ST Employee) धरपकड सुरू झाली होती. मात्र, यातील भडकवणारे प्रमुख कर्मचारी पळून गेल्याने त्‍यांचा शोध सुरू असल्याची माहिती पोलिस (Police) विभागातील सूत्रांनी दिली आहे.

सिल्व्‍हर ओकसमोरून सुरुवातीला १०९ एसटी कर्मचाऱ्यांना अटक करण्यात आली. त्यानंतर अॅड. सदावर्ते यांना आणि आझाद मैदानातील काही प्रमुख कर्मचाऱ्यांनासुद्धा अटक केली आहे. त्याशिवाय हल्‍ल्याच्या दरम्यान पळून जाणारे, सदावर्तेचे भाषण रेकॉर्ड करणाऱ्यांची धरपकड गावदेवी पोलिसांनी सुरू केली आहे. यामध्ये एमजेटी यूट्युब चॅनलच्या मालकाची सुद्धा शोध सुरू असल्याने या प्रकरणात आरोपी वाढण्याची शक्यता आहे.

सदावर्तेंचे जुने प्रकरण उघडणार

गेल्या पाच महिन्यात अॅड. सदावर्ते यांनी महाविकास आघाडीवर ज्याप्रमाणे तोंडसुख घेतले, त्यानुसार येत्या काळात सदावर्ते यांच्यावर यापूर्वी राज्यभरात पोलिस ठाण्‍यामध्ये दाखल झालेल्या तक्रारींच्या फाईल उघडण्याची शक्यता असल्याने त्‍यांच्या अडचणीत वाढ होणार आहे.

सदावर्तेंची सनद रद्द करण्याची मागणी

ॲड. गुणरत्न सदावर्ते यांची सनद रद्द करण्याची मागणी पुण्यातील वकिलाने बार कौन्सिल आॅफ महाराष्ट्र आणि गोवाकडे केली आहे. सदावर्ते यांनी व्यावसायिक गैरवर्तन केले असून त्यासाठी त्यांच्यावर कारवाई करावी. त्यांची वकिलीची सनद निलंबित करावी, अशी मागणी वकील ॲड. सतीश मंचेकर यांनी बार कौन्सिलकडे केली आहे. वकिलाचा गणवेश न्यायालयाबाहेर परिधान करणे, कर्मचाऱ्यांबरोबर निषेध व्यक्त करणे आदी बाबींचा उल्लेख करण्यात आला आहे.