मुंबई : लॉकडाऊनच्या काळात मुंबई महानगर प्रदेश विकास प्राधिकरणाची (एमएमआरडीए) सर्वच प्रकल्पांवरील कामे ठप्प झाली आहेत. तरी सध्या पावसाळापूर्व कामांची सुरुवात करण्यात आल्याचे अधिकाऱ्यांनी सांगितले. पश्चिम आणि पूर्व द्रुतगती मार्गाच्या पावसाळापूर्व कामांचा त्यात समावेश आहे. कास्टिंग यार्ड व काही पूरक कामे आरोग्याचे सर्व सुरक्षा निकष पाळून काही प्रमाणात सुरू असल्याचे अधिकाऱ्यांनी सांगितले.  

हे वाचलं का : पोलिस म्हणतात, वांद्रयातील मजुरांची गर्दी  म्हणजे कट नव्हता

कासारवडवली ते वडाळा मेट्रो 4 मार्गिकेचे ठाण्यातील काम सुरू करण्यास परवानगी मिळाली आहे. मार्गावरील काही कामे करण्यात येणार आहेत.  राज्यातील लॉकडाऊनचा कालावधी वाढवल्यामुळे एमएमआरडीएने रखडलेली कामे हाती घेतली. आधीच लॉकडाऊनमुळे सर्व कामे ठप्प करण्यात आली होती. त्यामुळे सर्व प्रकल्पाची डेडलाईन हुकणार आहे. त्यामुळे सध्या एमएमआरडीएकडून पावसाळापूर्व कामांची सुरुवात करण्यात आली आहे. त्यामध्ये पश्चिम आणि पूर्व द्रुतगती मार्गावरील प्रकल्पाची कामे पावसाळापूर्वी करण्याचा एमएमआरडीएचा मानस आहे. कास्टिंग यार्ड व काही पूरक कामे आरोग्याचे सर्व सुरक्षा निकष पाळून काही प्रमाणात एमएमआरडीएने कामाला सुरुवात केली आहे असे अधिकाऱ्यांकडून सांगण्यात आले.

दिलासादायक : 22 दिवसांनी परतले 2 हजार 882 खलाशी 

निविदा प्रक्रिया रखडली 
लॉकडाऊनमुळे  एमएमआरडीएने निविदा प्रक्रियेला 14 एप्रिलपर्यंत मुदतवाढ दिली होती. मात्र आता  लॉकडाऊन कालावधी वाढवल्यानंतर निविदा प्रक्रियेस 30 एप्रिलपर्यंत मुदतवाढ देण्यात आली आहे. परिणामी मेट्रो 2 बी मार्गिका आणि वडाळा कार डेपोच्या उर्वरित कामांसाठी प्राधिकरणाने लॉकडाऊनपूर्वीच नव्याने निविदा जारी केल्या होत्या. त्यांची अंतिम तारीख 15 एप्रिल होती. पण आता त्यास मुदतवाढ देण्यात आली आहे. त्यामुळे मुळातच विलंब होत असलेल्या प्रकल्प रखडणार आहेत.