मुकेश अंबानी यांच्या घराबाहेर स्फोटकांनी भरलेली कार सापडली होती. ही कार तेथे ठेवण्याचा कट आखण्याच्या आरोपाखाली राष्ट्रीय तपास यंत्रणेने वादग्रस्त पोलीस अधिकारी सचिन वाझेला अटक केली. सुरुवातीला विशेष न्यायालयाने त्याला २५ मार्च म्हणजेच आजपर्यंत NIA कोठडी सुनावली होती. मात्र या कटामध्ये अनेक नव्या गोष्टींचा उलगडा झाला असल्याने त्या गोष्टींचा तपास करण्यासाठी आणि सचिन वाझेची अधिक चौकशी करण्यासाठी न्यायलायने वाझेच्या NIA कोठडीत ३ एप्रिलपर्यंत वाढ केली आहे. २५ मार्चला वाझेच्या कोठडीची मुदत संपल्यामुळे विशेष एनआयए न्यायालयात त्याला हजर करण्यात आलं होतं. त्यानंतर न्यालायलाने हा निर्णय घेतला.

आतापर्यंत अंबानी यांच्या घरासमोर सापडलेल्या स्फोटकांचा तपास NIA करत होती. तर मनसुख हिरेन हत्या प्रकरणाचा तपास महाराष्ट्र एटीएसकडून करण्यात येत होता. पण आता दोन्ही प्रकरणाचा तपास NIA करणार असल्याने सचिन वाझेचा पाय आणखी खोलात गेल्याची चर्चा आहे. मनसुख हिरेन मृत्यू प्रकरणाचा तपास NIAला देण्यासंदर्भात ठाणे सत्र न्यायालयाने गुरुवारी महाराष्ट्र एटीएसला आदेश दिले. त्यामुळे मनसुख हिरेन प्रकरणाचा तपास देखील एनआयए करत असून या दोन्ही प्रकरणांमध्ये सचिन वाझे यांचा काय सहभाग होता? तसेच या दोन्ही प्रकरणांचा एकमेकांशी संबंध काय? याबाबतचा अधिक तपास NIAकडून केला जाणार आहे.

''बॅटिंग करायला मिळाल्यावर अधिक मजा येते''- देवेंद्र फडणवीस

महाराष्ट्र एटीएसने रविवारी मनसुख हिरेन हत्या प्रकरणाचा उलगडा झाल्याचं सांगितलं होतं. या प्रकरणात सचिन वाझे हा मुख्य आरोपी असून त्याने सारा कट रचला असं महाराष्ट्र एटीएसने सांगितलं होतं. त्याच मुद्द्यावर सचिन वाझेला एटीएसची कोठडी दिली जावी अशी मागणी करण्यात आली होती. पण त्याआधीच ठाण्याच्या न्यायालयाने या प्रकरणाचा तपास NIA कडे वर्ग करण्याचे आदेश दिले.