मुंबई : अंधेरी पूर्व येथील पोटनिवडणुकीतून भाजपने माघार घेतली आहे. त्यानंतर ठाकरे गटाच्या उमेदवार ऋतुजा लटके यांनी त्यांना सहकार्य करणाऱ्या सर्वांचे आभार मानले आहे. शरद पवार, राज ठाकरे, प्रताप सरनाईक यांनी रमेश लटके यांच्या मैत्रीची कदर केली त्यामुळे मी त्यांची कायम ऋणी राहीन अशा शब्दांत त्यांनी आभार मानले आहेत.

(Andheri By-Election Latest Updates)

"सर्वांची इच्छा होती की, ही निवडणूक बिनविरोध व्हावी, पण आता शेवटी ही निवडणूक बिनविरोध होत आहे. रमेश लटकेंनी ज्या प्रकारे जनतेचा विकास करण्याचा ध्यास घेतला होता त्याचप्रकारे अंधेरीचा विकास हेच माझे ध्येय असणार आहे" असं मत दिवंगत रमेश लटके यांच्या पत्नी ऋतुजा लटके यांनी व्यक्त केली. दरम्यान, भाजपचे मुरजी पटेल हे आपला अर्ज आज मागे घेणार असून त्यामुळे ठाकरे गटाच्या उमेदवाराला जिंकण्यासाठी मार्ग मोकळा झाला आहे.

मनसे अध्यक्ष राज ठाकरे आणि राष्ट्रवादीचे अध्यक्ष शरद पवार यांनी भाजपला उमेदवार मागे घेण्यासाठी मागणी केली होती. त्यानंतर शिंदे गटाचे आमदार प्रताप सरनाईक यांनीही पत्र लिहून ही निवडणूक बिनविरोध व्हावी यासाठी मागणी केली होती. त्यानंतर भाजपने बैठका घेऊन हा निर्णय घेतला आहे.

पोटनिवडणूक बिनविरोध करण्यासाठी शरद पवारांचे साकडे

राष्ट्रवादीचे अध्यक्ष शरद पवार यांनीदेखील अंधेरी पोटनिवडणूक प्रतिष्ठेची करू नका, कारण रमेश लटके यांचं योगदान पाहता ही निवडणूक बिनविरोध होणे गरजेचं आहे. गोपीनाथ मुंडे यांच्या निधनानंतर आम्हीही उमेदवार दिला नव्हता त्यामुळे भाजपने उमेदवार देऊ नये, अर्ज मागे घेण्याची मुदत अजून संपलेली नाही. एका वर्षासाठी निवडणुका नको असं म्हणत पवारांनी सर्वपक्षीय आवाहन केलं होतं.

राज ठाकरेंनीही पत्र पाठवून केली होती मागणी

ठाकरे गटाच्या उमेदवार ऋतुजा लटके यांच्या विरोधात उमेदवार देऊ नका, हे आपल्या संस्कृतीशी सुसंगत नाही असं म्हणत राज ठाकरेंनी भाजपला उमेदवार न देण्याची भावनिक साद घातली होती.