मुंबई : मुंबईच्या अंधेरी पूर्वेकडील रेल्वे स्थानक परिसरातील एका ओला कारने पेट घेतल्याची घटना घडली आहे. सुदैवाने या आगीत कुठलीही जिवितहानी झालेली नाही. वॅग्नर कंपनीची ओला कार अंधेरी पूर्वेकडील स्थानक परिसरात अडीच वाजण्याच्या सुमारास आली असता गाडीने अचानक पेट घेतला.

दरम्यान, गाडीला आग लागताच गाडी चालक आणि प्रवासी यांनी प्रसंगावधान राखून तात्काळ गाडीतून खाली उतरले. यामुळे जीवित हानी टळली. या घटनेत प्रवासी-ड्रायव्हर थोडक्यात बचावले.

सदर घटनेबाबत अग्निशमन दलाला माहिती मिळताच अग्निशमन दलाच्या जवानांनी घटनास्थळी धाव घेत आग आटोक्यात आणण्यासाठी प्रयत्न सुरू केले. तर यावेळी मोठी वाहतूक कोंडी झाल्याचं चित्र पाहायला मिळालं.

इलेक्ट्रीक दुचाकी आणि कारला आग लागण्याचे प्रकार अलीकडे वाढले असून अशा दुर्घटनेमध्ये अनेकांना जीव गमवावे लागले आहेत. त्यामुळे वाहने चालवताना आणि आग लागल्यानंतर प्रवाशांना काळजी घेतली पाहिजे.