मुंबई- मंत्रालयात बॉम्ब ठेवल्याची धमकी एका निनावी फोनद्वारे देण्यात आली होती. त्यानंतर बॉम्बशोधक पथक मंत्रालयात दाखल झालंय. मंत्रालयातील कंट्रोल रुमला एका अज्ञाताने फोन करुन बॉम्ब ठेवल्याची माहिती दिली. फोन आल्यानंतर खबरदारी म्हणून मंत्रालयातील पोलिस बंदोबस्तात वाढ करण्यात आली आहे. एका मराठी माध्यमाने यासंदर्भातील वृत्त दिलंय. या फोनमुळे एकच खळबळ उडाली आहे. (Anonymous phone call to bomb the maharashtra ministry police mumbai)

रविवारचा दिवस असल्याने मंत्रालयात जास्त दर्दी नव्हती. मिळालेल्या माहितीनुसार, मंत्रालयात आलेल्या फोनमध्ये परिसरात बॉम्ब ठेवण्यात आल्याचं सांगण्यात आलं. त्यानंतर तत्काळ बॉम्बशोधक पथकाला प्राचारण करण्यात आले. त्याचबरोबर पोलिसांचा फौजफाटा वाढवण्यात आला आहे. दुपारी बारा वाजण्याच्या सुमाराच हा फोन आला होता. रविवारची सुट्टी असल्याने कर्मचारी मंत्रालयात उपस्थित नाहीत. सध्या बॉम्बशोधक पथक मंत्रालय परिसराचा कसून तपास करत आहे. श्वानपथकाचीही मदत घेण्यात आली आहे. असे असले तरी नेमकं कोणी फोन केला याबाबत अद्याप माहिती मिळू शकलेली नाही.