मुंबई : अँटिलिया स्फोटक प्रकरणात (Antlia Explosive case) आरोपी असलेल्या क्रिकेट बुकि नरेश गोरच्या (cricket bookie naresh gaur) जामिनाविरोधात एनआयएने (NIA) केलेल्या याचिकेवरील सुनावणी पूर्ण झाली असून न्यायालयाने निकाल (Petition result pending) राखून ठेवला आहे. अँटिलिया स्फोटक आणि मनसुख हिरन हत्या प्रकरणात (Mansukh Hiren murder case) आरोपी असलेल्या गोरला विशेष न्यायालयाने जामीन मंजूर केला आहे. या निर्णयाला एनआयएने याचिकेद्वारे उच्च न्यायालयात (Mumbai High Court) आव्हान दिले आहे.

न्या नितीन जाधव आणि न्या सारंग कोतवाल यांच्या खंडपीठापुढे याचिकेवर आज सुनावणी पूर्ण झाली. गोर या प्रकरणात महत्वाचा आरोपी आहे आणि त्याच्यावर कटकारस्थानात सहभागी असल्याचा आरोप आहे, त्यामुळे त्याला जामीन मंजूर करू नये, असा युक्तिवाद अतिरिक्त सॉलिसिटर जनरल अनील सिंह यांनी केला आहे. गोरने प्रमुख आरोपी सचिन वाझेला बेनामी सिम कार्ड पुरविल्याचा आरोप आहे. ही कार्ड भुजवरुन बेनामी व्यवहार करुन आणण्यात आली होती असे सिंह यांनी सांगितले.

या आरोपांचे खंडन गोरच्या वतीने वकील शिरिष गुप्ते आणि एड अनिकेत निकम यांनी केले. केवळ सिम कार्ड पुरवली म्हणून कटकारस्थानात सहभाग होऊ शकत नाही, त्यासाठी एकत्र भेटल्याची माहिती हवी, सिम कार्ड दिल्याचा तपशील हवा, असा युक्तिवाद गुप्ते यांनी केला. भुजवरुन चौदा सिम कार्ड आणण्यासाठी त्याला पाठविले होते, त्यापैकी नऊ कार्ड वापरले नाही, असे त्यांनी स्पष्ट केले. खंडपीठाने सुनावणी पूर्ण केली असून निकाल ता. 21 पर्यंत राखून ठेवला आहे. वाझे या प्रकरणात अटकेत आहे.