"महाराष्ट्रात  जे चालू आहे, त्याची उत्तर ठाकरे सरकारला द्यावी लागणार. मनसुख हिरेनच्या खुनाचं प्रकरण NIA कडे गेलं. मात्र त्या आधी राज्य सरकारची भूमिका स्पष्ट होती. केंद्राकडून निर्देश येऊन पण हे प्रकरण NIA कडे जाऊ नये यासाठी प्रयत्न केला. कोर्टाच्या आदेशानंतर ATS ने ही कागदपत्र एनआयएला पाठवली. राज्य सरकारला मनसुख हिरेन खुनाची केस आपल्याकडे का ठेवायची होती?" असा सवाल आशिष शेलार यांनी विचारला आहे. "मनसुख हिरेन हत्या प्रकरणात मोठं षडयंत्र रचण्यात आलं होतं. पुरावे नष्ट करणे, चौकशीची दिशा भरकटवणे हे राज्य सरकारचा हेतू होता" असा आरोप आशिष शेलार यांनी केला. 

"मुंब्रा खाडीत मनसुख यांचा मृतदेह मिळल्यानंतर रुमालाच्या पट्ट्या होत्या. मृताच्या शरीरावर रुमाल मिळाला नाही, असं म्हटलं आहे. ते रुमाल मृत शरीरावरुन कोणी पळवले. पोस्टमोटर्म रिपोर्टमध्ये त्याचा उल्लेख का नाही? पोलिसांनी पुरावे नष्ट करण्याचे प्रयत्न केले" असा आरोप आशिष शेलार यांनी केला. 

"कोणत्याही गुन्ह्यात शवविच्छेदन करताना व्हिडीओ रेकॉर्डिंग महत्वाचे आहे. पाच मार्च २०२१ ला शवविच्छेदन केलं. दोन तास हे शवविच्छेदन सुरु होतं. पण एक-एक मिनिटाच्या सात ते आठ व्हिडीओ क्लिप बनवण्यात आल्या. म्हणजेच छेडछाड करण्याचं काम केलं गेलं. कोणाच्या सांगण्यावरून हे केलं? कोण मंत्री, कोण अधिकारी होता? कोणाच्या सांगण्यावरुन हे केलं" असा सवाल आशिष शेलारांनी विचारला. 

डायटॉम टेस्टवरुन काय म्हणाले आशिष शेलार.....
मनसुख हिरेन यांच्या मृतदेहाच्या डायटॉम टेस्टवरुन भाजपाचे नेते आणि आमदार आशिष शेलार यांनी जे.जे. रुग्णालयावर अत्यंत गंभीर स्वरुपाचे आरोप केले आहेत. मनसुख हिरेन यांचा मृतदेह मुंब्रा रेतीबंदर येथील खाडीत सापडला होता. मनसुख हिरेन यांनी पाण्यात उडी मारुन आत्महत्या केली आहे का? हे तपासण्यासाठी मृतदेहाची डायटॉम टेस्ट करण्यात आली. डायटॉम टेस्टमधुन मृत व्यक्तीच्या  फुफ्फुसांमध्ये पाणी होतं का? हे तपासलं जातं. मान्यताप्राप्त प्रयोगशाळाच ही टेस्ट करु शकते. मनसुख यांच्या अवयवांचे नमुने कलिना फॉरेन्सिक लॅबला पाठवल्यानंतर त्यांनी आम्ही ही चाचणी करु शकत नाही, हे स्पष्टपणे सांगितलं.