डोंबिवली - घरात सुरू असलेल्या लाऊड स्पीकरचा आवाज कमी कर म्हणून सांगण्यासाठी गेलेल्या तरुणाला शेजाऱ्यांनी दांडक्याच्या साह्याने बेदम मारहाण केल्याची घटना कल्याण मध्ये घडली आहे. या हल्ल्यात जखमी तरुणाच्या डोक्याला 15 टाके पडले आहेत. तर मध्यस्थी करणाऱ्या जखमीच्या मित्रालाही मारहाण करण्यात आली आहे.

या प्रकरणी कोळसेवाडी पोलीस ठाण्यात जुनैद व त्याच्या अन्य दोन साथीदारांविरुद्ध मारहाणीचा गुन्हा दाखल करण्यात आला आहे. कल्याण पूर्वेतील सूचक नाका परिसरात मंगळवारी रात्री नऊ ते साडेनऊच्या दरम्यान ही घटना घडली.

जखमी आझाद अल्ताफ रहेमानी (वय 25) या जखमी तरुणाच्या तक्रारीनुसार सुन्नी नूरी जामा मशिदीजवळ राहणारा जुनैद याच्या घरात स्पीकर वाजत होता. त्याचा आवाज खूप मोठा होता. स्पीकरच्या आवाजामुळे शेजारी राहणाऱ्या रहिवाशांना त्रास होऊ लागला. त्यामुळे आझाद हा जुनैदच्या घरी गेला आणि त्याने आवाज कमी करण्यास सांगितले. हे ऐकून जुनैद संतापला. तू इथून जा, मी आवाज कमी करणार नाही, असे धमकावले.

मात्र आझाद याने तुझ्या स्पिकरच्या आवाजामुळे साऱ्यांना त्रास होत असल्याचे सांगितले. यावर जूनैद आणखीच भडकला. त्याने रस्त्यावर पडलेल्या दांदक्याच्या साह्याने आझादवर हल्ला चढविला. या हल्ल्यात आझादचे डोके फुटून तो गंभीर जखमी झाला. तर जुनैदच्या दोन पैकी एका साथीदाराने आझादला पकडून त्याच्या अंगठ्याला चावा घेतला.

आझादला मारहाण होत असल्याचे पाहून मध्यस्थी करण्यासाठी गेलेल्या त्याचा मित्र तबारख शेख यालाही दांडक्याने बुकलून काढले. त्यानंतर हल्लेखोरांनी तेथून पळ काढला. जखमी अवस्थेत आझाद याला जवळच्या खासगी हॉस्पिटलमध्ये दाखल करण्यात आले. त्याच्या डोक्यावर तातडीने शस्त्रक्रिया करण्यात आली. या शास्त्रक्रियेत डोक्याला पंधरा टाके पडले.

या प्रकरणी कोळसेवाडी पोलिसांनी हॉस्पिटलमध्ये उपचार घेत असलेल्या जखमी आझादच्या जबानीवरून फरार हल्लेखोर जुनैद आणि त्याच्या दोन साथीदारांविरुद्ध गुन्हा नोंदवून शोध सुरू केला आहे.