डोंबिवली - मलंगगड भागातील काकडवाल गावात वीजचोरी शोध मोहिम पथकाला मारहाण झाल्याची घटना काही दिवसांपूर्वी घडली होती. पथकास मारहाण करणारे काकडवाल गावातील दुधकर कुटूंबाने तब्बल 17 लाख 68 हजार 780 रुपयांची वीज चोरी केली असल्याची बाब महावितरणच्या पहाणीत उघडकीस आली आहे. वीज चोरी प्रकरणी दुधकर कुटूंबाविरोधात अंबरनाथ पोलिस ठाण्यात गुन्हा दाखल करण्यात आला आहे.

कल्याण पूर्वेतील मलंगगड पट्ट्यात वीजचोरी मोठ्या प्रमाणात होते. या भागातील वीज चोरी उघडकीस आणण्यासाठी तसेच वीज बील वसुलीसाठी महावितरणच्या वतीने विशेष मोहीम हाती घेण्यात आली आहे. काकडवाल गावातील दुधकर कुटूंबाच्या घरी महावितरणचे भरारी पथक हे 11 जानेवारीला पाहणीसाठी गेले होते.

या पथकामध्ये महावितरणच्या कार्यकारी अभियंत्यांसह इतर अभियंते व कर्मचारी असे दहा ते बारा जणांचे पथक होते. या पथकास दुधकर कुटूंबाकडून मारहाण करण्यात आली होती. याप्रकरणी दुधकर कुटूंबातील अनंता, अशोक आणि प्रकाश यांसह पाच जणांविरोधात हिललाईन पोलिस ठाण्यात गुन्हा दाखल करण्यात आला होता.

महावितरण अधिकाऱ्यांनी अधिक तपास केला असता या तिघांनीही मीटरकडे येणाऱ्या केबलला टॅपिंग करत मीटर टाळून वीजचोरी केल्याचे आढळून आले. अनंता दूधकर याने 6 लाख 69 हजार 550 रुपयांची सुमारे 28 हजार 252 युनिटची चोरी केली.

प्रकाश दूधकर याने 7 लाख 23 हजार 390 रुपयांची 30 हजार 869 युनिट तर अशोक दूधकर याने 3 लाख 57 हजार 840 रुपये किमंतीची 13 हजार 211 युनिट वीज चोरून वापरल्याचे पोलिसांना दिलेल्या फिर्यादीत नमूद करण्यात आले आहे. सहायक अभियंता रविंद्र नाहिदे यांनी दिलेल्या फिर्यादीवरून अंबरनाथ पोलिसांनी गुन्हा दाखल केला असून या गुन्ह्याचा तपास उपनिरीक्षक श्रीरंग गोसावी करत आहेत.