- सुशांत सावंत

मुंबई: अनुसूचित जाति आयोगाचे उपाध्यक्ष अरुण हलदार (Arun haldar) यांनी काल समीर वानखेडे (Sameer wankhede) यांना क्लीन चीट दिली. त्याच मुद्दावरुन आज नवाब मलिक (Nawab malik) यांनी अरुण हलदार यांच्यावर जोरदार टीका केली व अरुण हलदर यांचे वागणे संशयास्पद असल्याचं वक्तव्य केलं. समीर वानखेडे यांनी घोटाळे करुन सर्टिफिकेट, (Forge certificate) नोकरी मिळवली, असा नवाब मलिक यांचा आरोप आहे. त्या पार्श्वभूमीवर नवाब मलिक यांनी अरुण हलदार यांच्यावर टीका केली.

"अनुसूचित जाति आयोगाचे उपाध्यक्ष अरुण हलदार यांनी काल समीर वानखेडे यांनी कोणतही धर्म परिवर्तन केलं नाही" असं म्हटलं. "हलदर हे समीर वानखेडे यांच्या घरी जातात आणि क्लीन चिट देतात. त्यानंतर राज्यमंत्री रामदास आठवले हे स्वतः पत्रकार परिषद घेतात. ज्याने घोटाळे करून सर्टिफिकेट घेतले त्याचे समर्थन हे मंत्री करतात हे दुर्देव आहे" असे नवाब मलिक म्हणाले.

"खोटी कागदपत्रे तपासण्याचा अधिकार मागासवर्गीय आयोगाला नाही. खोट्या कागदपत्राची पडताळणी करण्यासाठी एक कमिटी असते मागासवर्गीय आयोगाला हे अधिकार नाहीत असे नवाब मलिक म्हणाले. अरुण हलदर यांचे हे वागणे संशयास्पद आहे. वैधानिक पदावर बसलेली व्यक्ती हे वागू शकते का? याबाबत आम्ही राष्ट्रपतींना तक्रार करणार आहोत. केंद्रीय राज्यमंत्र्यांकडे देखील तक्रार करणार आहोत" असे नवाब मलिक म्हणाले.

क्रांती रेडकरबद्दल मलिक म्हणाले...

मी समीर वानखेडे यांच्या दुसऱ्या पत्नीचे कधीच नाव घेतले नाही. मी त्यांच्या दोन्ही मुलींबाबत देखील कधी बोललो नाही. समीर वानखेडे यांच्या खोट्या कागदपत्राची तक्रार आम्ही कमिटीसमोर करणार आहोत, असे नवाब मलिक म्हणाले.