मुंबई: कॉर्डेलिया क्रूझ ड्रग्ज प्रकरणात (drug case) आर्यन खानला (aryan khan) काल मुंबई उच्च न्यायालयाने (Mumbai high court) जामीन मंजूर केला. मागच्या २६ दिवसांपासून आर्थररोड कारागृहात बंद असलेल्या आर्यनची आज किंवा उद्या सुटका होऊ शकते. पण ही सुटका होण्याआधी काही कायदेशीर प्रक्रियांचे पालन करावे लागणार आहे. आर्यनच्या जामिनाच्या आदेशाची (bail order) प्रत मिळाल्यानंतर सर्वप्रथम ती एनडीपीएस कायद्यातंर्गत विशेष कोर्टात सादर करावी लागेल. कारण एनसीबीकडे आर्यन खान आणि अन्य आरोपींची कोठडी आहे.

न्यायाधीश सांब्रे जामिनाच्या आदेशात काही कॅश बाँडही ठोठावू शकतात. जामिनाची ही प्रक्रिया सर्वात आधी सत्र न्यायालयात पूर्ण होईल. त्यानतंर एनडीपीएस कोर्ट संबंधित जेल यंत्रणेला आर्यनच्या सुटकेसाठी आदेश जारी करेल. आर्थर रोड कारागृहाबाहेर एक बॉक्स आहे. त्यामध्ये मानशिंदेंची टीम सुटकेचा आदेश आणि बाँड पेपर्स टाकतील.

शुक्रवारी संध्याकाळी ५.३० आधी ही प्रक्रिया पूर्ण झाली पाहिजे. कारण त्यावेळी बॉक्स शेवटचा रिकामा होतो. सर्व कागदोपत्रांची प्रक्रिया वेळेवर पूर्ण झाली, तर तुरुंग प्रशासन सुटकेची तयारी सुरु करेल आणि संध्याकाळी सात वाजेपर्यंत आर्यन खान तुरुंगातून बाहेर येऊ शकतो. कशामध्येही विलंब लागू नये, यासाठी सतीश मानशिंदेंची कायदेशीर टीम आपल्याबाजूने सर्व प्रयत्न करत आहे.