भाईंदर - उत्तन येथील धावगीच्या डोंगरावर असलेल्या कचराभूमीला शनिवारी रात्री आठ वाजण्याच्या सुमारास भीषण आग लागली. ही आग एवढी प्रचंड होती की लांबूनही आगीच्या ज्वाळा अगदी स्पष्टपणे दिसून येत होत्या.

कचर्‍याला लागलेल्या आगीमुळे आसपासच्या परिसरात मोठ्या प्रमाणावर धूर पसरला आहे. गेल्या दोन दिवस तापमानात मोठी वाढ झाली आहे. त्यामुळे देखील कचराभुमीत साठून राहिलेल्या कचर्‍याला आग लागली असण्याची शक्यता व्यक्त केली जात आहे.

दरम्यान आगीच्या घटनेची माहिती मिळताच मिरा भाईंदर महानगरपालिकेच्या अग्निशमन दलाच्या तीन गाड्या व एक पाण्याचा टँकर कचराभूमीवर पोहोचले. मात्र कचर्‍याला आतल्या बाजूने आग लागली असल्यामुळे त्यावर रात्री उशिरापर्यंत नियंत्रण मिळवणे शक्य झाले नव्हते. आगीमुळे उत्तन व आसपाच्या गावात मोठ्या प्रमाणात धूराचे लोट पसरले आहेत. त्यामुळे नागरिकांना मनस्ताप सोसावा लागत आहे.

शहरात गोळा झालेला वर्गीकरण न झालेला मिश्र स्वरुपातील कचर्‍यावर प्रक्रिया होऊ शकत नसल्यामुळे तो उघड्यावरच साठवण्यात आला आहे. या साठून राहिलेल्या कचर्‍यात विषारी वायू तयार होत असून त्याला अधून मधून आग लागण्याच्या घटना घडत असतात. आगीमुळे निर्माण होणारे धूराचे प्रचंड लोट आसपासच्या गावत पसरत असल्याने स्थानिकांना मोठा त्रास सहन करावा लागत आहे. त्यामुळेच स्थानिकांमध्ये कचराभूमीबद्दल प्रचंड नाराजी आहे.

कचराभूमीत उघड्यावर साठून राहिलेल्या कचर्‍यावर बायोमायनिंग पद्धतीने प्रक्रिया करण्यासाठी महापालिकेने तयार केलेल्या प्रकल्प अहवालाला नुकतीच शासनाने मान्यता दिली असून लवकरच ही प्रक्रिया सुरु होणार आहे.