भिवंडी : मुंबईवगळता (Mumbai) राज्यातील आगामी महापालिकेच्या निवडणुका तीनसदस्यीय पद्धतीने घेण्याबाबत सरकारकडून परिपत्रक जाहीर झाल्याने भिवंडीत त्या दृष्टीने मोर्चेबांधणी सुरू झाली आहे. भिवंडी (Bhiwandi) काँग्रेसला (Congress) आधीच गळती लागली असताना, उरल्यासुरल्या नगरसेवकांनाही गळाला लावण्यासाठी समाजवादी पक्ष, राष्ट्रवादी काँग्रेसचे पदाधिकारी सक्रिय झाले आहेत. याबाबत गोपनीय बैठका सुरू असल्याने आगामी काळात काँग्रेस पक्षाला खिंडार पडणार असल्याच्या चर्चा शहरात रंगू लागल्या आहेत.

भिवंडी-निजामपूर महापालिकेची सार्वत्रिक निवडणूक साधारण एप्रिल महिन्यात लागण्याची शक्यता आहे. कोरोनाचा प्रादुर्भाव आटोक्यात आल्याने उमेदवारांच्या प्रचाराच्या व निवडणुका लढण्याच्या अपेक्षा उंचावल्या आहेत. त्यानुसार आपापल्या प्रभागांमध्ये पदाधिकारी व नगरसेवकांनी मोर्चेबांधणी सुरू केली आहे.

भिवंडी पालिकेत सध्या काँग्रेसचे ४७, भाजप २०, शिवसेना १२, समाजवादी पक्ष २, अपक्ष ९ असे पक्षीय बलाबल आहे. त्यापैकी काँग्रेसच्या १८ नगरसेवकांवर निलंबनाची टांगती तलवार असल्याने त्यांनी काही महिन्यांपूर्वी राष्ट्रवादीमध्ये प्रवेश करत या पक्षाला जिवंत केले आहे. दरम्यान पक्षविरोधी कारवाई केल्याने काँग्रेसच्या या १८ नगरसेवकांविरोधात कोकण भवन येथे याचिका दाखल असून हे प्रकरण प्रलंबित आहे. ठाणे

संभाव्य २०२२ मध्ये होणाऱ्या पालिका निवडणुकीत भाजपचे केंद्रीय मंत्री कपिल पाटील व शिवसेनेचे ठाणे जिल्हा पालकमंत्री एकनाथ शिंदे हे आपापल्या पातळीवरून काँग्रेस व राष्ट्रवादी, समाजवादीच्या राजकारणाला शह देण्यासाठी मैदानात उतरतील, हे निश्चित आहे.