भिवंडी : कोरोनाच्या पार्श्‍वभूमीवर भिवंडी महापालिकेची महासभा ऑनलाईन झूम अॅपवर झाली. कोरोनामुळे नागरिकांचे मोठ्या प्रमाणात हाल झाले आहेत. ही बाब लक्षात घेत महापालिका क्षेत्रातील तीन महिन्यांचे मालमत्ता कर व पाणीपट्टी माफ करण्याची घोषणा महापौर प्रतीभा पाटील यांनी केली. मालमत्ता कर आणि पाणीपट्टी माफ करणारी भिवंडी ही राज्यातील पहिलीच महापालिका ठरली आहे. 

मोठी बातमी : तबलिगी जमात प्रकरण: मुंबईतल्या 'या' चार ठिकाणी ईडीकडून छापेमारी सुरु

कोरोनाच्या पार्श्‍वभूमीवर महापालिकेच्या सभागृहात प्रथमच झूमवर महासभेचे आयोजन करण्यात आले होते. मात्र प्रत्यक्ष सभागृहात महापौर प्रतिभा पाटील, आयुक्त डॉ. पंकज आशिया, उपमहापौर, अतिरिक्त आयुक्त ओमप्रकाश दिवटे, विरोधी पक्ष नेता यशवंत टावरे, सभागृह नेता विलास पाटील यांच्यासह काही नगरसेवक, नगरसचिव अनिल प्रधान उपस्थित होते. ऑनलाईन महासभेत नगरसेवक सिद्धेश्‍वर कामूर्ती, जावेद दळवी, रिषीका प्रदीप राका, प्रशांत लाड, मनोज काटेकर आदी नगरसेवक गटनेते चर्चेत सहभागी झाले होते. कोरोना काळात शहरातील गरीब-गरजू यांना मदत करणाऱ्या सेवाभावी संस्था, डॉक्‍टर, मनपाचे कर्मचारी व नागरिकांचे महापौरांनी आभार मानले. लॉकडाऊन काळातील तीन महिन्यांचे मालमत्ता कर व पाणीपट्टी माफ करण्याचा विषय पत्रिकेतील चर्चा करून स्थायी सभापती हलीम अन्सारी यांनी कर माफ करण्याची मागणी केली. सभागृह नेता विलास पाटील यांनी त्याला अनुमोदन दिले. 

महत्वाची बातमी : महात्मा ज्योतिबा फुले आरोग्य योजनेची मुदत वाढली; आरोग्य विभागाने घेतलेल्या निर्णयाविषयी जाणून घ्या

- प्रशासनाला कारवाईचे आदेश 

लॉकडाऊन काळात शहरातील व्यापारी, करदाते, गरीब नागरिक यांचे फार मोठे नुकसान झाले आहे. हे नुकसान भरून येणारे नाही. शहरातील नागरिकांना थोडासा तरी आर्थिक दिलासा देणे हे पालिकेचे कर्तव्य आहे. ही बाब लक्षात घेता नागरिकांना तीन महिने मालमत्ता कर व पाणीपट्टी माफ करण्याचा निर्णय महापौर पाटील यांनी यावेळी जाहीर केला. तरी प्रशासनाने त्याप्रमाणे कारवाई करावी, असे आदेश प्रशासनास दिले.

(संपादन : वैभव गाटे)

bhiwandi municipal corporation take decision about tax and water bill