मुंबई - भोसरी भूखंड घोटाळा प्रकरणी राष्ट्रवादी काँग्रेसचे नेते एकनाथ खडसे यांच्या पाठोपाठ त्यांच्या पत्नी मंदाकिनी खडसे यांनादेखील न्यायालयाने दिलासा दिला आहे. मुंबईतील विशेष पीएमएलए न्यायालयाने शुक्रवारी मंदाकिनी खडसे यांना 2 लाखांच्या जातमुचलक्यावर अटीसह जामीन मंजूर केला आहे. तसेच त्यांना काही अटीदेखील घालण्यात आल्या आहेत. त्यांना विनापरवानगी देश सोडून जाता येणार नाही असेही सांगण्यात आले आहे.

पुण्याच्या भोसरी येथील एमआयडीसीच्या भूखंड खरेदीमध्ये पदाचा गैरवापर केल्याचा एकनाथ खडसे, त्यांच्या पत्नी मंदाकिनी खडसे आणि जावई गिरीश चौधरी यांच्यावर आरोप होता. या जमिनीची मूळ किंमत 32 कोटी रुपये असून पत्नी मंदाकिनी खडसे आणि गिरीश चौधरी यांनी ती फक्त 3 कोटी रुपयांत खरेदी केली असल्याचे सांगण्यात येत होते.

घटनाक्रम

देवेंद्र फडणवीस सरकारमध्ये महसूल मंत्री असताना एकनाथ खडसे यांनी पुण्यातील भोसरी येथे 3.1 एकर एमआयडीसी प्लॉट खरेदी करण्यासाठी आपल्या पदाचा गैरवापर केल्याचा आरोप 2016 मध्ये झाला होता. 3.1 कोटी रुपये किंमत असलेल्या या भूखंडाची निव्वळ 3.7 कोटी रुपयांना विक्री झाल्याचा दावा केला गेला होता. रेडीरेकनर दरापेक्षा खूपच कमी बाजारमूल्य दाखवून जमिनीची खरेदी झाल्याचा आरोप आहे.

याप्रकरणी फडणवीस यांनी निवृत्त न्यायाधीश झोटींग समितीची नियुक्ती केली होती. त्यानंतर हे प्रकरण मागे पडले होते, मात्र आता पुन्हा हे प्रकरण पुढे आल्याने एकनाथ खडसे यांच्या अडचणी वाढल्या होत्या. या प्रकरणी एकनाथ खडसे यांचे जावई गिरीश चौधरी यांच्यावर ठपका ठेवण्यात आला होता. ईडीने एकनाथ खडसेंची चौकशी केली होती. त्यानंतर गिरीश चौधरी यांना चौकशीसाठी बोलावले होते.