मुंबई, ता. 5 - महानगरी मुंबईत 2013 ते 2018 या काळात बलात्कार आणि विनयभंगाच्या गुन्ह्यांत अनुक्रमे 83 टक्के व 95 टक्के अशी मोठी वाढ झाली आहे. याच काळात दंगलीचे गुन्हे 36 टक्‍क्‍यांनी आणि लहान मुलांवरील लैंगिक अत्याचारांच्या तक्रारी 19 टक्‍क्‍यांनी वाढल्याची माहिती प्रजा फाउंडेशनने प्रसिद्ध केलेल्या अहवालातून समोर आली आहे. 

मुंबईत महिलांवरील अत्याचाराच्या घटनांमध्ये सतत वाढ होत असल्याचे चित्र काही वर्षांत समोर येत आहे. 2013 ते 2018 दरम्यान बलात्काराचे गुन्हे 432 वरून 702 वर गेले; ही वाढ 83 टक्के आहे. विनयभंगाच्या गुन्ह्यांत तर तब्बल 95 टक्के वाढ झाल्याचे आढळते; या गुन्ह्यांत 1209 वरून 2358 पर्यंत वाढ झाली. लहान मुलांवरील लैंगिक अत्याचारांच्या गुन्ह्यांची संख्या 2015-16 मध्ये 891 होती, हे प्रमाण 2016-17 मध्ये 928 आणि 2017-18 मध्ये 1062 वर गेले.