कासा (बातमीदार) : डहाणू-नाशिक राज्यमार्गावर गंजाड लोठीचा देवपाडा येथे राज्य परिवहन मंडळाची बस व दुचाकी यांची धडक झाली. या अपघातात दुचाकीचालक जबर जखमी होत मृत्युमुखी पडला. गंजाड येथे रहिवासी कैलास भुरकुड (वय २६) हा मिस्त्री काम करत होता. तो कामासाठी डहाणू येथे दुचाकीवरून मंगळवारी (ता. २१) रोजी सकाळी आठ वाजण्याच्या सुमारास जात असताना कोल्हापूरकडे जाणाऱ्या बसला धडक देत अपघातग्रस्त झाला. या घटनेची माहिती डहाणू पोलिसांना कळताच त्वरित पोहोचत मृतदेह डहाणूतील कॉटेज रुग्णालयात नेण्यात आला. पुढील कारवाई सुरू आहे, असे सांगण्यात आले. मृत्यमुखी पडलेल्या कैलास याचे नुकतेच लग्न झाले असून त्याच्या पश्चात आई-वडील, भाऊ असा परिवार आहे.