मुंबई- बुधवारी भाजप नेते आणि उपमुख्यमंत्री देवेंद्र फडणवीस यांनी राजीनामा देण्याची तयारी दाखवली होती. त्यानंतर आज फडणवीस दिल्लीला जाणार असल्याची माहिती मिळत आहे. दिल्लीमध्ये ते नरेंद्र मोदी आणि अमित शहा यांची भेट घेण्याची शक्यता आहे. त्यामुळे फडणवीस मोदी-शहा यांच्यापुढे आपल्या राजीनाम्याची इच्छा बोलून दाखवतील, असा अंदाज व्यक्त केला जात आहे.

महाराष्ट्रामध्ये लोकसभा निवडणुकीमध्ये भारतीय जनता पक्षाला मोठ्या अपयशाला सामोरे जावे लागले आहे. २०१९ च्या लोकसभा निवडणुकीत २३ जागा जिंकणाऱ्या भाजपला यंदाच्या लोकसभा निवडणुकीत ९ जागांवर समाधानी राहावं लागलं आहे. भाजपच्या १४ जागा कमी झाल्या आहेत. या अपयशाची जबाबदारी देवेंद्र फडणवीस यांनी स्वीकारली आहे. त्यामुळेच त्यांनी पत्रकार परिषदेत राजीनामा देण्याची तयारी दाखवली.

लोकसभा निवडणुकीतील खराब कामगिरीनंतर भाजप नेत्यांनी बुधवारी पत्रकार परिषद घेतली. या बैठकीला देवेंद्र फडणवीस, भाजप प्रदेशाध्यक्ष चंद्रशेखर बावनकुळे, आशिष शेलार इत्यादी प्रमुख नेते उपस्थित होते. यावेळी देवेंद्र फडणवीस यांनी राज्यातील भाजपच्या पराभवाची कारणमिमांसा केली. तसेच, पराभवाची जबाबदारी स्वीकारत, पदावरुन मुक्त करण्याची इच्छा व्यक्त केली.

जनतेने दिलेला कौल आम्ही मान्य करतो. आता विधानसभेसाठी पूर्ण तयारी करायची आहे. त्यामुळे मला सरकारमधून मुक्त करण्यात यावं. अशी विनंती केंद्राकडे करणार आहे, असं देवेंद्र फडणवीस यावेळी म्हणाले होते. देवेंद्र फडणवीस यांच्या या वक्तव्यानंतर राज्याच्या राजकारणात नव्या चर्चाला तोंड फुटले आहे. त्यातच आता फडणवीस आज दिल्लीला जाणार असल्याने ते खरंच राजीनामा देणार का अशी चर्चा आहे.

देवेंद्र फडणवीस हे उपमुख्यमंत्रीपदाचा राजीनामा देतील आणि भाजप प्रदेशाध्यक्ष पद स्वीकारतील अशी चर्चा सुरु झाली आहे. शिवाय चंद्रशेखर बावनकुळे यांना राज्यामध्ये मंत्रिपद दिलं जाईल असंही बोललं जात आहे. मात्र, आज दिल्लीत गेल्यानंतर फडणवीस यांना कसा प्रतिसाद मिळतो हे पाहावं लागणार आहे. भाजपचे हायकंमांड यावर काय निर्णय घेतं हे पाहणं औत्सुक्याचं असणार आहे.