मुंबई - छत्रपती शिवाजी महाराजांची वाघनख महाराष्ट्रात आणण्यासाठी करार झाल्यानंतर त्यावरुन भाजपा आणि विरोधकांमध्ये आरोप प्रत्यारोपाचा दुसरा अंक रंगणार असल्याचे चित्र आहे. या वाघ नखांच्याबाबत शंका घेणाऱ्यांना प्रत्युत्तर म्हणून मुंबई भाजपाने गुरुवारी (ता.१२) दादरच्या स्वातत्रविर सावरकर सभागृहात एका कार्यक्रमाचे आयोजन केले आहे.मुंबई भाजपा अध्यक्ष आशिष शेलार यांनी ही माहिती दिली.

शंकेखोरांचा कोथळा बाहेर काढणारच - वाघ नखांच्या निमित्ताने' असे या कार्यक्रमाचे नाव देण्यात आले आहे. या कार्यक्रमात अभिनेते डॉ. राहुल सोलापूरकर यांचे व्याख्यान तर शाहीर नंदेश उमप यांचा पोवाडा सादर होणार आहे.

लंडनमधील संग्रहालयातून छत्रपती शिवाजी महाराजांनी वापरलेली वाघनखे आणण्याचा करार महाराष्ट्र सरकारने केला. नोव्हेंबरमध्ये तीन वर्षासाठी वाघनखे येणार आहेत. मुंबईसह राज्यातील अन्य भागांमध्ये ही वाघनखे जनतेसाठी खुली असतील.

आदित्य ठाकरे यांनी यावर शंका व्यक्त केली आहे. त्याला सडेतोड उत्तर देण्यासाठी हा कार्यक्रम असल्याचे शेलार यांनी म्हटले. ज्यांच्या मनात शंकेची कीड वळवळत आहे त्यांनी आपल्या बुद्धीत भर घालण्यासाठी कार्यक्रमाला यावे, असे आवाहन देखील शेलार यांनी आदित्य ठाकरे यांना केले आहे.

मतांसाठी हे लांगूलचालन सुरू आहे. त्यामुळे अफजलखानाचा कोथळा काढण्यासाठी वापरलेली वाघनखे नको, ती वाघनखे खरी आहेत का? अशी शंका विशिष्ट वर्गाला बरं वाटण्यासाठी उपस्थित केली जाते.

- आशिष शेलार, अध्यक्ष, मुंबई भाजपा

हल्ली भाजपला सगळीकडे उद्धव आणि आदित्य ठाकरेचं दिसतात. ज्या पध्दतीने महाराष्ट्राच्या जनतेकडून या दोघांना प्रतिसाद मिळत आहे. त्यामुळे भाजप अस्वस्थ आहे. त्यामुळे कुठलाही विषय आला की भाजप त्यात उद्धव किंवा आदित्य ठाकरे यांना ओढतात. त्यातून आपल्या प्रसिध्दीची हौस भागवून घेतात.

- हर्षल प्रधान, जनसंपर्क प्रमुख, शिवसेना (ठाकरे)