मुंबई: पुढच्यावर्षाच्या सुरुवातीला फेब्रुवारी महिन्यात मुंबई महानगर पालिकेची निवडणूक (Bmc Election) होणार आहे. या निवडणुकीसाठी राज्यातील सर्वच प्रमुख पक्ष कामाला लागले आहेत. भाजपा (Bjp) आधीपासून मुंबई महापालिका जिंकण्यासाठी मोर्चेबांधणी करत आहे. मनसे (Mns) अध्यक्ष राज ठाकरे (Raj thackeray) यांनी देखील पालिका निवडणुकीला प्राधान्य दिले आहे. त्या दृष्टीने त्यांचे दौरे सुरु आहेत.

काँग्रेसही या तयारीमध्ये मागे नाहीय. काँग्रेसचे मुंबई अध्यक्ष भाई जगताप यांनी मुंबई महापालिकेतील गैरकारभाराविरोधात वेळोवेळी आवाज उठवला असून काँग्रेस पूर्ण शक्तीनिशी मुंबई महापालिकेची निवडणूक लढवेल हे आधीच स्पष्ट केले आहे. काँग्रेस या निवडणुकीत एकला चलो रे च्या भूमिकेत आहे.

त्यामुळे राज्यातील सत्तेसाठी काँग्रेसने भले शिवसेना-राष्ट्रवादी सोबत आघाडी केली असेल, पण महापालिका निवडणूक काँग्रेस स्वतंत्र लढवणार असल्याचे संकेत मिळत आहेत. काँग्रेसने उमेदवार निवडीमध्ये अन्य पक्षांवर आघाडी घेतली आहे. काँग्रेसने इच्छुक महिला उमेदवारांची निवड सुरू केली आहे. काँग्रेसने महिला उमेदवारांच्या मुलाखतीला सुरुवात केली आहे. मुंबई अध्यक्ष भाई जगताप यांच्याकडून इच्छुक उमेदवारांच्या कागदपत्रांची पडताळणी सुरू केली आहे.