मुंबई : मुंबईमध्ये लोक कोरोना (coronavirus) नियमांचं पालन करतात. त्यामुळे आता कोरोना मृत्यूंची संख्या शून्यावर आली. कोरोना कमी झाला आहे. पण संपला नाही. त्यामुळे काळजी घेणे गरजेचे आहे. तिसऱ्या लाटेची भीती कमी झाली असली तरी तिसरी लाट येणार नाही, असं नाही. त्यासाठी नियम पाळणे गरजेचे आहे, असे मुंबई महापालिकेच्या महापौर किशोरी पेडणेकर (BMC mayour kishori pednekar) म्हणाल्या.

मुंबईत लसीकरणाचा वेग वाढवण्यासाठी फिरते लसीकरण केंद्र असतील. लसीकरणापासून कोणालाही वंचित ठेवायचे नाही. त्यामुळे फिरते लसीकरण केंद्र सुरू करतोय. मुंबई महापालिका लहान मुलांचे लसीकरण करायला सज्ज आहे. मात्र, त्यासाठी राज्य शासनाच्या मार्गदर्शक तत्वांची प्रतिक्षा आहे. तसेच ३४३ कोविड रुग्णांचे नमुने घेतले होते. त्यात डेल्टा प्लसचे रुग्ण कमी झाले आहेत, असेही महापौर म्हणाल्या.

आज मुख्यमंत्री उद्धव ठाकरेंची टास्क फोर्ससोबत बैठक आहे. मात्र, निर्बंध हटवायचे की नाहीत याबाबत राज्यातील परिस्थितीचा आढावा घेऊन राज्य सरकार निर्णय घेईल. तसेच राज्य शासनाकडून आलेल्या आदेशाचं आम्ही पालन करू, असेही महापौर म्हणाल्या. तसेच लोकल प्रवासाबाबत देखील त्यांनी भाष्य केलं असून लोकल प्रवासाबाबत राज्य सरकार निर्णय घेईल, असं त्या म्हणाल्या.