मुंबई: मुंबई महापालिकेच्या क्षेत्रातील रुग्णालयांना 24 तास लसीकरणाची मंजुरी देण्यात आली आहे. कोरोना लसीकरणासाठी होणारी गर्दी पाहता हा निर्णय पालिका प्रशासनाकडून घेण्यात आला असून संपूर्ण सुविधा आणि पुरेसे मनुष्यबळ असणाऱ्या रुग्णालयांना करता 24 तास लसीकरण सुरू ठेवता येणार आहे. दरम्यान 24 तासांच्या लसीकरणातून मुंबईत किमान दररोज 75000 चे लक्ष्य राहिल असे मुंबई महापालिका अतिरिक्त आयुक्त सुरेश काकाणी यांनी सांगितले आहे.

कोविड -19 लसीकरणाच्या प्रक्रियेस गती देण्यासाठी मुंबई महानगरपालिकेने मंगळवारी शहरातील विविध रुग्णालयांना चोवीस तास लसीकरण मोहीम घेण्यास परवानगी दिली आहे जर त्यांच्याकडे त्यासाठी आवश्यक त्या सर्व सुविधा असतील.

महानगरपालिकेने मंगळवारी हा निर्णय घेतला जेव्हा कोविन अॅपच्या बिघाडामुळे जवळपास 100 हून अधिक ज्येष्ठ नागरिकांना खूप वेळ कोरोना लसीकरणासाठी वाट बघावी लागली. त्यामुळे, सोमवारच्या तुलनेत मंगळवारी फक्त काही प्रमाणातच लसीकरणाचा आकडा वाढलेला दिसला. सोमवारी  40,502 लोकांचे लसीकरण केले गेले होते. त्यानंतर मंगळवारी एकूण 43,581 चे लसीकरण करण्यात आले.

हेही वाचा- म्हणून पालक- विद्यार्थी करणार शिक्षणमंत्र्यांच्या बंगल्यासमोर ठिय्या आंदोलन

खासगी रुग्णालयांना 24 तास परवानगी

24 तास लसीकरणाच्या परवानगीविषयी अतिरिक्त आयुक्त सुरेश काकाणी यांनी सांगितले की, 24 तास लसीकरणाला परवानगी देण्यात आली असून खासगी रुग्णालयांना 24 तास लसीकरण सुरू ठेवण्याच्या सूचना दिल्या आहेत. रविवारी ही सुरू ठेवले तरी काही हरकत नाही. ज्यांच्याकडे जास्त मनुष्यबळ आहे आणि ज्या केंद्रांवर जास्त लोक लसीकरणासाठी येत असतील तर त्यांनी 24 तास सुरू ठेवण्यासाठी हरकत नाही. आतापर्यंत 6 पर्यंत लसीकरण केले जात होते. पण, आता 24 तास सुरू केले आहे.

टप्प्याटप्प्याने वाढवले जाईल

बीकेसीसारख्या जंबो कोविड केंद्रात मोठ्या प्रमाणात गर्दी होते. शिवाय, तिथे मनुष्यबळ ही जास्त आहे. त्यामुळे तिथे किमान 9 पर्यंत किंवा 10 पर्यंत लसीकरण सुरू ठेवता येऊ शकेल. शिवाय, टप्प्याटप्प्याने इतर केंद्रांवरही लसीकरण वाढवले जाईल. सध्या मनुष्यबळ मर्यादित आहे आणि सुरूवातीला लोकांमध्ये संध्याकाळचे लसीकरण घेण्यास उत्साह असेल आणि नंतर जर संख्या कमी झाली तर मनुष्यबळ कामाला लावूनही उपयोग होणार नाही. शिफ्टनुसार कर्मचारी काम करत आहेत जर जास्तच गर्दी होत असेल तर पालिकेच्या रुग्णालयांमध्ये किंवा केंद्रांमध्ये एक किंवा दोन तास थांबून लसीकरण वाढवता येईल. मात्र, खासगी रुग्णालये 24 तास लसीकरण त्यांच्या सोयीनुसार राबवू शकतील असे ही काकाणी यांनी स्पष्ट केले आहे.

मुंबई विभागातल्या ताज्या बातम्या वाचण्यासाठी येथे क्लिक करा.

येथे होऊ शकेल 24 तास लसीकरण?

पालिका सुविधांपैकी, बीकेसी जंबो केंद्र, सेव्हन हिल्स आणि काही वैद्यकीय महाविद्यालये यासारखी सर्वात मोठी केंद्रे देखील त्यांची सेवा 24 तासांपर्यंत वाढवू शकतील. सध्या 24 पालिकेच्या सुविधांसह, सहा राज्य आणि केंद्र शासकीय रुग्णालये आणि 38 खासगी रुग्णालयांसह 68 केंद्रांमध्ये 184 बूथवर लसीकरण केले जात आहे. 

शहरातील अनेक रुग्णालयांनी नेहमीच्या वेळेपेक्षा अधिक सेवा देण्याचे मान्य केले आहे. खासगी रुग्णालयांपैकी बॉम्बे रुग्णालय प्रशासनाकडून सांगण्यात आले की, सकाळी दहा वाजेपर्यंत लसीकरण केले जाऊ शकेल. तर, जास्तीत जास्त 16 तास लसीकरण करता येऊ शकेल असे बीकेसी जंबो केंद्राचे अधिष्ठाता डॉ. राजेश डेरे यांनी सांगितले.

---------------------------------------

(संपादन- पूजा विचारे)

Bombay Municipal Corporation hospitals sanctioned 24 hours corona vaccination