अंधेरी : सात हजार रुपयांची लाच घेताना वरळी आरे दुग्धशाळा विभागाच्या सहाय्यक व्यवस्थापक रणजीतसिंग कोमलसिंग राजपूत यांना गुरुवारी लाचलुचपत प्रतिबंधक विभागाच्या अधिकार्‍यांनी अटक केली. यातील तक्रारदार नियत वयोमानानुसार आरे दुग्धशाळा विभागातून निवृत्त झाले होते. त्यांनी सेवानिवृत्तीनंतर मिळणार्‍या लाभाच्या रक्कमेसाठी महालेखा कार्यालयात एक अर्ज केला होता.

या अर्जानंतर संबंधित कर्मचार्‍यांच्या कागदपत्रांच्या प्रक्रियेत रणजीतसिंग राजपूत यांनी त्यांच्याकडे दहा हजाराची लाचेची मागणी केली होती. लाच दिल्यानंतर त्यांच्या अर्जाच्या कागदपत्रांवर स्वाक्षरी करुन ही फाईल पुढे पाठविली जाईल असे सांगण्यात आले होते. लाच देण्याची इच्छा नसल्याने त्यांनी रणजीतसिंग राजपूत यांच्याविरुद्ध लाचलुचपत प्रतिबंधक विभागात तक्रार केली होती. बुधवारी १९ एप्रिलला या तक्रारीची शहानिशा करण्यात आली होती.

त्यात रणजीतसिंग यांनी लाचेची मागणी केल्याचे उघडकीस आले होते. त्यानंतर तक्रारदार गुरुवारी सात हजार रुपये संबंधित कार्यालयात गेले होते. यावेळी लाचेची ही रक्कम घेताना रणजीतसिंग राजपूत यांना या अधिकार्‍यांनी रंगेहाथ पकडले. गुरुवारी झालेल्या या कारवाईने कार्यालयातील इतर अधिकारी आणि कर्मचारी वर्गात एकच खळबळ उडाली.