Bus Accident in wada : बस आणि ट्रकचा भीषण अपघात झाल्याची घटना शुक्रवारी सकाळी वाडा-मलवाडा रस्त्यावरील मलवाडा फाटा येथे घडली. यात ४७ विद्यार्थी आणि ८ प्रवासी जखमी झाले आहेत. यातील दोघांची प्रकृती गंभीर आहे. त्यांच्यावर वेगवेगळ्या खासगी आणि शासकीय रुग्णालयांत उपचार सुरू आहेत. यात एकूण ६३ प्रवासी प्रवास करत होते.

ही बस चिंचपाडा येथून सकाळी सव्वासहाच्या सुमारास वाड्याच्या दिशेने येत होती. ५६ विद्यार्थी यात प्रवास करत होते. वाड्यापासून एक किमी अंतरावर देसई नाका येथील वळणावर ट्रकला धडकून हा अपघात झाला. सर्व प्रवाशी बेसावध असल्याने त्यांच्या तोंडाला, दातांना, डोक्याला जबर मार लागला आहे. बहुसंख्य जणांना मुका मार तसेच जखमा झाल्या आहेत.

अपघाताची माहिती समजताच वाडा ग्रामीण रुग्णालयात नागरिकांची प्रचंड गर्दी झाली होती. यातील तेजू घाटाळ (वय १७) या विद्यार्थिनीच्या डोक्याला व तोंडाला जबर दुखापत झाली आहे. तिला उपचारासाठी ठाणे येथे पाठवण्यात आले, तर चालक शंकर सोनकांबळे यांना वाड्यातील रुग्णालयात दाखल करण्यात आले.

अपघाताची माहिती मिळताच पालघरचे जिल्हाधिकारी गोविंद बोडके व एस. टी. महामंडळाचे वाहतूक नियंत्रक अधिकारी विलास राठोडयांनी भेट देऊन जखमींची विचारपूस केली.