महाड (बातमीदार) : अ आणि क जीवनसत्त्वाचा भरपूर स्त्रोत असलेले कॅनरी चिबूड रायगड जिल्ह्यामध्ये दाखल झाले आहे. महाड बाजारपेठेतही या फळांनी आपले पाय पसरले आहेत. पिवळ्या धम्मक रंगाचे हे आकर्षक चिबूड ग्राहकांसाठी कुतूहलाचा विषय बनले आहेत. सध्या या फळाकडे ग्राहकांचा फारसा कल नसला, तरीही येत्या काळात हे फळही लोकप्रिय होईल, असा अंदाज फळविक्रेत्यांना आहे. 

रायगड जिल्ह्यात गावठी चिबूडांना मोठ्या प्रमाणात मागणी असते. पेण, इंदापूर, गोरेगाव गावांमधून गावठी चिवडाचे उत्पादन मोठ्या प्रमाणात घेतले जाते. गावठी चिबूड मऊसर व चवीला गोड असतात. आता परदेशातून येणाऱ्या कॅनरी चिबूडाने बाजारपेठेमध्ये आगमन केले आहे. बाजारात त्याचा केरळी चिबूड असा अपभ्रंशही केला जातो. जिल्ह्यातील बाजारपेठेत दाखल झालेले हे चिबूड दिसायला सुंदर असल्याने ग्राहकांचा कुतूहलाचा विषय झाला आहे. जपान, दक्षिण कोरिया, मॅंक्‍सिकोमध्ये यांची लागवड होते आणि त्यांना विशेष मागणी असते. 

भारतातही काही वर्षांपासून या फळांनी पाय पसरले आहेत. या महिन्यात जिल्ह्यात या चिबूडाची सुमारे सहा-सात टन आवक झाली आहे. वाशी व पुणे येथून या फळांचा पुरवठा होतो. बाहेरून पिवळ्या रंगाचा आणि आतून गुलाबी व पांढरा रंगाचा हा चीबूड असतो. या चिबूडाचे वैशिष्ट्य असे की, हा चवीला चांगला आहे आणि थोडा कडक आहे. तो टिकाऊ असल्याने भविष्यात त्याची मागणी वाढण्याची शक्‍यता असल्याचे विक्रेता अब्बास शेख याने सांगितले. या चिबूडाची बाजारामध्ये सध्याचे किंमत ६० रुपये किलो आहे. ग्राहकांसाठी हे फळ नवीन असल्याने सध्या ग्राहक फळांची केवळ चव घेत आहेत आणि सावधानतेने फळ विकत घेत आहेत. या फळाचा परिचय झाल्यावर हळूहळू ड्रॅगन फ्रुट, किव्ही, तसेच इतर परदेशी फळांप्रमाणेच मागणी वाढेल, असा विश्वास विक्रेत्यांना आहे. 

या फळाचे वैशिष्ट्य म्हणजे यामध्ये सर्वाधिक क व अ जीवनसत्त्व आहे. त्यामुळे जीवनसत्त्वाच्या फायद्यामुळे या फळांचा वापर बाहेरील देशांमध्ये अधिक प्रमाणात केला जातो. 

गावठी चिबूड २० रुपयांपासून मिळत आहे. तसेच ते पारंपरिक फळ असल्याने नागरिकांना आवडते. या चिबूडाची चव चांगली असली, तरी किंमत जास्त आहे. किंमत कमी झाल्यास याचीही विक्री वाढेल. 
- विजय पालेकर, ग्राहक