मुंबई : ज्येष्ठ नेत्ररोगतज्ज्ञ डॉ. तात्याराव लहाने यांनी डोळ्यांच्या काही शस्त्रक्रिया आदेशाशिवाय केल्याचा ठपका ठेवला असल्याची माहिती समोर येत आहे. जे. जे. रुग्णालयातील तीन सदस्यीय चौकशी समितीने हा प्राथमिक निष्कर्ष काढल्याचे सांगण्यात येत आहे; मात्र यावर अधिकृतपणे बोलायला मात्र चौकशी समितीचे सदस्य तयार नाहीत.

डॉ. लहाने यांनी हे आरोप फेटाळले असून योग्य चौकशी न करता माझ्यावर आरोप लावले जात असल्याचे डॉ. लहाने यांनी ‘सकाळ’शी बोलताना सांगितले.

प्राथमिक अहवालानुसार डॉ. लहाने यांनी बऱ्याचशा शस्त्रक्रिया कोणत्याही परवानगीशिवाय किंवा प्रशासकीय आदेशाशिवाय केल्या असल्याचे या समितीच्या अहवालात सांगण्यात आले असल्याची माहिती आहे. राज्य सरकारच्या अंधत्व निवारण मोहिमेंतर्गत समन्वयक असताना डॉ. लहाने यांनी या शस्त्रक्रिया केल्याचे बोलले जात आहे.

तत्कालीन नेत्ररोग विभागाच्या प्रमुख डॉ. रागिणी पारेख यांना यासंदर्भात खुलासा करण्यासही समितीने सांगितल्याची माहिती आहे. हा चौकशी समितीचा अहवाल अधिष्ठात्यांकडे पाठवला गेल्याचेही सांगण्यात आले.

दरम्यान, याविषयी जे. जे. रुग्णालय समूहाच्या अधिष्ठात्या डॉ. पल्लवी सापळे यांच्याशी ‘सकाळ’ने संपर्क साधल्यावर, मी सध्या दिल्लीत आहे; चौकशी पूर्ण झाली असल्यास हा गोपनीय अहवाल मी वाचल्यानंतर मला भाष्य करता येईल असे सांगितले.

राजीनाम्यानंतरही चौकशी

विद्यार्थ्यांच्या आंदोलनानंतर आम्ही राजीनामे दिले. माझी कोणत्याही प्रकारची चौकशी झालेली नाही. सर्व शस्त्रक्रिया नियमाच्या चौकटीत राहून केल्या आहेत. मार्डचा विषय हा वेगळा होता. त्यानंतरही हा विषय थांबलेला नाही, याचा अर्थ यामध्ये राजकारण सुरू झाले आहे. या विभागातील गरीब रुग्णांसाठी सेवा विस्कळित झाली त्याचे काय?

- डॉ. तात्याराव लहाने, ज्येष्ठ नेत्रविकारतज्ज्ञ