टिटवाळा : मध्य रेल्वेच्या आंबिवली आणि टिटवाळा रेल्वेस्थानकांमध्ये कसारा दिशेला जाणाऱ्या मार्गावरील ओव्हरहेड वायरमध्ये तांत्रिक अडचण निर्माण झाल्यामुळे सोमवारी (ता. 14) काही वेळ दोन्ही बाजूकडील लोकल सेवा विस्कळित झाली होती. मात्र यावेळी मेल व एक्‍स्प्रेस गाड्या बंद करून लोकल सेवा सुरू केल्यामुळे प्रवाशांना दिलासा मिळाला.

सोमवारी दुपारी 12.04 ते 12.55 वाजण्याच्या दरम्यान आंबिवली-टिटवाळा रेल्वेस्थानकांदरम्यान कसारा दिशेला जाणाऱ्या रेल्वे मार्गावरील ओव्हरहेड वायरमध्ये अचानक बिघाड झाला; त्यामुळे छत्रपती शिवाजी टर्मिनसकडे जाणारी वाहतूक ही काही काळ बंद झाली होती. ती अर्ध्या तासानंतर सुरू झाली.

दरम्यान, कसारा दिशेच्या गाड्याही काही वेळात सुरू होतील, असे रेल्वेचे प्रभारी एस. बी. महिबार यांनी सांगितले. यावेळी अडकलेल्या रेल्वे प्रवाशांना होणारी अडचण लक्षात घेऊन मेल व एक्‍स्प्रेस गाड्या बंद करून लोकल सेवा सुरू केल्यामुळे प्रवाशांना दिलासा मिळाला.