मुंबई - उपनगरी रेल्वे मार्गावरील रुळांची दुरुस्ती तसेच सिग्नल यंत्रणेत काही तांत्रिक कामे करण्यासाठी मध्य रेल्वे मुख्य मार्गावर आज शनिवारी रात्री मेगाब्लॉक घेणार आहे. तर रविवारी ५ नोव्हेंबर २०२३ रोजी हार्बर मार्गावर मेगाब्लॉक घेण्यात येणार आहे.

मध्य रेल्वे -

• कुठे- भायखळा ते माटुंगा अप- डाऊन जलद मार्गावर

• कधी- शनिवारी मध्य रात्री १२.३५ ते पहाटे ४.४५ वाजेपर्यंत

परिणाम -

या ब्लॉकदरम्यान सीएसएमटी येथे येणार्‍या अप मेल / एक्स्प्रेस माटुंगा ते भायखळा दरम्यान अप धीम्या मार्गावर वळवण्यात येतील. तसेच दादर येथील प्लॅटफॉर्म क्रमांक ३ वर एक्स्प्रेसला दोनदा थांबा दिला जाईल. डाऊन मेल / एक्स्प्रेस भायखळा ते माटुंगा दरम्यान डाऊन धीम्या मार्गावर वळवण्यात येतील. या एक्स्प्रेसला दादर स्थानकातील प्लॅटफॉर्म क्रमांक १ वर दोनदा थांबा देण्यात येणार आहे.

हार्बर मार्गावर -

• कुठे- कुर्ला ते वाशी अप- डाऊन हार्बर मार्गावर

• कधी- रविवार सकाळी ११.१० ते सायंकाळी ४.१० पर्यंत

परिणाम -

या ब्लॉकदरम्यान सीएसएमटी ते पनवेल / बेलापूर आणि बेलापूर ते सीएसएमटी लोकल सेवा रद्द करण्यात आल्या आहेत. ब्लॉक काळात प्रवाशांच्या सोयीसाठी सीएसएमटी ते कुर्ला दरम्यान विशेष लोकल धावतील. तसेच ब्लॉक कालावधीत ठाणे - वाशी / नेरुळ स्थानकांदरम्यान लोकल सुर राहणार आहे.