वाडा ः वाडा तालुक्‍यातील चिंचघर गावात गेल्या चार दिवसांत शिवसैनिकांच्या तीन चारचाकी गाड्यांच्या काचा फोडल्याचा धक्कादायक प्रकार घडल्याने येथील नागरिक धास्तावले आहेत. वाहनांच्या नुकसानीच्या भीतीने अनेक जण आपली वाहने आता नातेवाईकांकडे ठेवत असल्याचे समोर आले आहे. 

चुकवू नका...जन्मनोंदणीची अखेरची संधी!

चिंचघर येथील शिवसैनिक दामोदर लाड यांची कार (१० जानेवारी), भूषण पाटील यांची जीप (ता.११) आणि शिक्षक सेनेचे पालघर जिल्हाध्यक्ष मनेश पाटील यांच्या चारचाकीच्या (रविवारी) मागील काच पहाटेच्या सुमारास गाडीवर भलेमोठे दगड टाकून फोडण्यात आल्याचे उघड झाले आहे. दिवसागणिक वाहनांचे नुकसान केले जात असल्याने या तोडफोड प्रकरणाचा येथील नागरिकांनी धसका घेतला आहे.

वसईत विद्यार्थ्यांना गुदमरण्याचे प्रशिक्षण?

वाहनांचे नुकसान होऊ नये, या भीतीने येथील नागरिक आता आजूबाजूच्या गावातील नातेवाईकांकडेच चारचाकी वाहने नेऊन ठेवत असल्याचे समोर आले आहे. राजकीय वादामुळे की भांडणे लावण्यासाठी हा प्रकार केला जात आहे, याबाबत नागरिकांमध्ये चर्चा रंगली आहे. दरम्यान, कुडूस पोलिस दूरक्षेत्रात याबाबत गुन्हा दाखल करण्यात आला असून पोलिस तपास करत आहेत. 

या प्रकरणानंतर गावात शांतता व सुव्यवस्था राखण्यासाठी आज सकाळी कुडूस पोलिस दूरक्षेत्रात चिंचघर गावातील नागरिकांची बैठक बोलावण्यात आली होती. या प्रकरणाचा छडा लवकरात लवकर न लावल्यास शिवसेनेतर्फे आंदोलन करण्यात येईल, असा इशारा या वेळी शिवसैनिकांनी दिला.

वाहनांच्या तोडफोड प्रकरणाचा लवकरात लवकर छडा लावून गाड्यांचे नुकसान करणाऱ्या आरोपींना अटक केली जाईल. परिसरातील फोन टॅप केले असून सीसी टीव्हीची तपासणी करण्यात येत आहे. 
गोविंद बोराडे, 
सहायक पोलिस निरीक्षक, वाडा पोलिस ठाणे