मुंबई - राज्यातील नागरिकांना आलेल्या वाढीव वीजबिलांविरोधात महाराष्ट्र नवनिर्माण सेनेने आंदोलन पुकारले आहे. ठाण्यातही जिल्हाध्यक्ष अविनाश जाधव यांच्या नेतृत्वात आंदोलनाची हाक देण्यात आली होती. परंतु मोर्चा सुरू होताच पोलिस आणि मनसैनिकांमध्ये झटापटी झाली. 

हेही वाचा - पुढच्या आठवड्यात चौकशीसाठी हजर राहा, प्रताप सरनाईकांना ईडीकडून समन्स

राज्यातील नागरिक कोरोना काळात आर्थिक तंगीत असताना वाढीव वीजबिलांमुळे त्यांच्यावरील ताण वाढला आहे. राज्य सरकारने आधी या बिलांमध्ये सवलत देण्यात येईल असे म्हटले होते. परंतु त्यानंतर महावितरणाने सवलत नाकारल्या नंतर नागरीकांमध्ये संतापाची लाट आहे. याबाबत मनसेने जोरदार आंदोलन पुकारले आहे, मुंबई, ठाणे, पुणे सह राज्यात अनेक ठिकाणी आंदोलने सुरू आहेत. ठाण्यात कॅडबरी जंक्शन - नौपाडापासून अविनाश जाधव यांच्या नेतृत्वात आंदोलन करण्यात आले.  पोलिसांनी या आंदोलनाला परवानगी दिली नव्हती. म्हणून मनसैनिक आणि पोलिसांमध्ये झटापटी झाल्याची माहिती मिळत आहे. यावेळी आंदोलनकर्ते आणि पोलिसात जोरदार राडा पाहायला मिळाला.

हेही वाचा - मुख्यमंत्री उद्धव ठाकरे यांची 26/11 दहशतवादी हल्ल्यातील शहिदांना आदरांजली

आंदोलनकर्त्यांवर पोलिसांनी कारवाई केली. अविनाश जाधव, रविंद्र जाधव आणि अभिजित पानसे यांनाही ताब्यात घेण्यात आले आहे. यासोबत मनसेच्या महिला कार्यकर्त्यांनाही पोलिसांनी ताब्यात घेतले. 'सरकार आमचे आंदोलन दडपण्याचा प्रयत्न करीत आहे. सर्वसामान्यांना वीजबिलांतून सवलत मिळायलाच हवी. सरकारचा आम्ही निषेध करतो', असे अविनाश जाधव यांनी म्हटले आहे.