मुंबई : सत्तेच्या सारीपाटावर सध्या ठाणेकरांनी वेगळा ठसा उमटवला आहे. त्यामुळे ठाणेकरांची ओळख आता सातासमुद्रापार पोहोचली आहे. त्यांच्या आवडी-निवडी सुद्धा फार वेगळ्या असून, ठाणेकरांची खाद्य संस्कृती सुद्धा वेगळीच आहे. त्यातच त्यांची एक वेगळी पसंती सुद्धा राज्य उत्पादन शुल्क विभागाच्या आकडेवारीवरून पुढे आली आहे. राज्यातील सहा विभागांतील वाईन विक्रीची आकडेवारी बघता वाईनला सर्वाधिक पसंती मुख्यमंत्र्यांच्या ठाणेकरांनी दिली आहे.

एकट्या ठाणे विभागात ४२.६५ लाख बल्क लिटर वाईन विक्री गेल्या वर्षभरात झाली आहे. तर त्यानंतर दुसऱ्या क्रमांकावर पुणेकर आहेत. त्‍यांनी सुद्धा वाईन पसंत केली आहे. पुण्यात १९.३ लाख बल्क लिटर वाईन विक्रीची नोंद राज्य उत्पादन शुल्क विभागाच्या आकडेवारीवरून दिसून येत आहे. २०१७ मध्ये वाईन विक्रीची आकडेवारी बघता त्यावेळी सुद्धा सर्वाधिक वाईन विक्री ठाणे विभागातच झाली होती. त्यानंतर दरवर्षी ठाणेकर आणि पुणेकरांची वाईनला पसंती दिसून आली आहे.

ठाणे विभागात गेल्यावर्षात मुंबई उपनगरात १७.९० लाख बल्क लिटर वाईन विक्री झाली आहे. तर ठाण्यात १०.२० लाख बल्क लिटर विक्रीची नोंद झाली आहे. तर पुणे विभागातून एकट्या पुण्यात १६.४० लाख बल्क लिटर वाईन विक्रीची नोंद राज्य उत्पादन शुल्क विभागाच्या आकडेवारीवरून दिसून येत आहे. गेल्या पाच वर्षांत ठाणेकर आणि पुणेकरांची वाईन पसंती वाढताना दिसून येत आहे.

आकडेवारी वर्ष २०२१-२२

ठाणे विभाग (आकडेवारी लाख बल्क लिटर)

• मुंबई शहर - ५.८८

• मुंबई उपनगर- १७.९०

• ठाणे - १०.२०

• पालघर - ४.२२

• रायगड - ४.४५

• एकूण - ४२.६५

• पुणे विभाग

• पुणे - १६.४०

• अहमदनगर - १.६५

• सोलापुर - ०.९९

• एकूण - १९.३