गणपती विसर्जनाच्या मिरवणुकीदरम्यान काल शिंदे गट आणि ठाकरे गट यांच्यात चांगलीच बाचाबाची झाली. याचं रुपांतर मारहाणीत झालं, या प्रकरणी आता ५ जणांना अटक करण्यात आली आहे. शिंदे गटाचे आमदार सदा सरवणकर यांनी हवेत गोळीबार केल्याचा आरोपही शिवसैनिकांकडून करण्यात आला आहे. दरम्यान, सरवणकर यांनी हे वृत्त फेटाळून लावलं आहे. तर शिंदे गटाचे कार्यकर्ते संतोष तेलवणे यांनी घटनाक्रम सांगितला आहे.

शिंदे गटाचे कार्यकर्ते संतोष तेलवणे यांनी या मारहाणीचा सविस्तर घटनाक्रम सांगितला आहे. तेलवणे याविषयी बोलताना म्हणाले की, काल रात्री माझ्या बिल्डिंगखाली उभा होतो, तेव्हा ठाकरे गटाचे ५० एक लोक आले. मी एकटाच होतो. ते आले आणि मला म्हणाले की, बोल आता काय बोलतोस? पण मीपण या लोकांना पुरून उरलो. त्यांना म्हटलं की तुम्हाला हात लावायचा तर लावा, मला ठार मारा, जिवंत ठेवला तर तुम्हा एकेकाला घरातून उचलून घेईन. मला फक्त उद्धव ठाकरेंचं वाईट वाटतं. आता पूर्वीची शिवसेना राहिलेली नाही. आम्ही बाळासाहेबांच्या विचाराने चाललेले शिवसैनिक आहोत. म्हणून आमच्यात हिंमत आहे.

गणपती विसर्जनावेळी आमची मिरवणूक चांगली झाली, त्यामुळे ठाकरे गट फिका पडला, म्हणूनच आम्हाला मारहाण केल्याचा आरोप तेलवणे यांनी केला आहे. सदा सरवणकरांनी गोळीबार केल्याच्या आरोपावर उत्तर देताना तेलवणे म्हणाले की गोळीबार वाघावर होतो, शेळ्यांवर नाही. पोलीस स्थानकात कुठलाही गोळीबार झालेला नाही. अटक करण्यासाठी आणि प्रकरण वाढवण्यासाठी खोटी बातमी पसरवली जात आहे.