मुंबईः  बॉलिवूडमधील ड्रग्स प्रकरणाचा तपास करणाऱ्या नार्कोटिक्स कंट्रोल ब्युरो (एनसीबी) च्या दोन अधिकाऱ्यांना कॉमेडियन भारती सिंह आणि तिच्या पतीला मदत केल्याच्या संशयावरून निलंबित करण्यात आले आहे. याप्रकरणी विभागीय चौकशी करण्यात येत आहे.

हे दोन्ही अधिकारी कॉमेडियन भारती सिंह आणि दीपिका पदुकोणची मॅनेजर करिश्मा प्रकाश याप्रकरणातही तपास करत होते. निलंबनाबरोबरच या दोन्ही अधिकाऱ्यांच्या संशयास्पद भूमिकेची चौकशी करण्याचे आदेश एनसीबीचे विभागीय संचालक समीर वानखेडे यांनी दिले आहेत. ड्रग्स प्रकरणी अटक झालेल्या आरोपींची तत्काळ सुटका आणि इतर एका आरोपीवर कारवाई करण्यात दिरंगाई केल्याचा दावा या अधिकाऱ्यांविरोधात करण्यात आला आहे. 

ड्रग्स प्रकरणात कॉमेडियन भारती सिंह आणि तिचा पती हर्ष लिंबाचिया यांना 21 नोव्हेंबर रोजी अटक झाली होती. 22 नोव्हेंबर रोजी त्यांना कोर्टात हजर केले असता दोघांना 14 दिवसाची न्यायालयीन कोठडी सुनावण्यात आली होती. न्यायालयीन कोठडी होताच दोघांनी तत्काळ जामिनासाठी अर्ज केला होता. विशेष म्हणजे दुसऱ्याच दिवशी त्यांना जामीन मिळाला.

अधिक वाचा-  प्रत्येक आठवड्याला 30 लाखांची ड्रग्स विक्री, मोठा कालाचिठ्ठा झाला उघड

या जामीनाच्या सुनावणी वेळी सदर प्रकरणाशी संबंधित अधिकारी न्यायालयात हजर झाला नाही. त्यामुळे भारतीच्या जामीन अर्जाला विरोध केला गेला नाही. तसेच, त्यांनी भारतीच्या जामीन अर्जाबाबत एनसीबीच्या वरिष्ठ अधिकाऱ्यांना काही कळवले नाही. एनसीबीने कॉमेडियन भारती सिंह आणि तिचा पती हर्ष लिंबाचिया यांचा जामीन रद्द करावा, अशी मागणी विशेष एनडीपीएस न्यायालयात केली आहे.

मुंबई विभागातल्या ताज्या बातम्या वाचण्यासाठी येथे क्लिक करा.

बॉलिवूडमध्ये ड्रग्स प्रकरणाचा तपास करणा-या एनसीबीने दोघांना न्यायालयीन कोठडीत पाठवण्याऐवजी चौकशीसाठी एनसीबीच्या ताब्यात सोपवण्यात यावे, अशी मागणी केली आहे. न्यायालयाने मंगळवारी या संदर्भात भारती आणि हर्षला नोटीस पाठवली असून, या आठवड्यात सुनावणी होण्याची शक्यता वर्तवण्यात येत आहे.

----------------------------------

(संपादन- पूजा विचारे)

Comedian Bharti Singh case Two Narcotics Control Bureau officials suspended