मुंबई: मुंबई काँग्रेसमध्ये (Mumbai congress) सर्वकाही आलबेल नसून पक्षांतर्गत संघर्ष वाढत चालला आहे. गटबाजीने पुन्हा एकदा डोकं वर काढलं आहे. एकाबाजूला काँग्रेसकडून स्वबळाचा नारा दिला जातोय. पुढच्यावर्षीची मुंबई महापालिकेची (BMC) निवडणूक पूर्ण ताकतीने लढवण्याचे संकेत काँग्रेसने दिले आहेत. मुंबई काँग्रेस अध्यक्ष भाई जगताप (bhai jagtap) यांच्या नेतृत्वाखाली पक्षाकडून विविध आंदोलन सुरु आहेत. (Congress mla zishan siddiqui complaint to highcommand against mumbai congress president bhai jagtap)

पालिका निवडणुकीसाठी काँग्रेस कार्यकर्त्यांमध्ये उत्साह, जोश निर्माण करण्याचे प्रयत्न सुरु आहेत. पण हे सर्व सुरु असताना मुंबई काँग्रेसमधील पक्षांतर्गत गटबाजी सुद्धा तितकीच तीव्र होतेय. यापूर्वी सुद्धा गटबाजीमुळे मुंबई काँग्रेसचे नुकसान झाले आहे.

आता मुंबई काँग्रेस अध्यक्ष भाई जगताप यांच्या विरोधात काँग्रेस अध्यक्ष सोनिया गांधी,राहुल गांधी यांच्याकडे तक्रार करण्यात आली आहे. काँग्रेस आमदार झीशान सिद्दीकी यांनी ही तक्रार केली आहे. झिशान सिद्दीकी यांनी सोनिया गांधी आणि राहुल गांधी यांना पत्र लिहून भाई जगताप यांच्या विरोधात गंभीर आरोप केले आहेत.

माझ्याच पक्षाचा अध्यक्ष माझ्या विरोधात कारवाया करत असल्याचा गंभीर आरोप आमदार झीशान सिद्दीकी यांनी पत्रात केला आहे. यासाठी झीशान यांनी काही घटनांचा दाखला दिला आहे. या वादावर काँग्रेस मंत्री बाळासाहेब थोरात यांनी पक्षांतर्गत विषय आहे. समोरासमोर बसून मार्ग काढला जाईल असे सांगितले आहे. झीशान सिद्दीकी मागच्या काही दिवसांपासून चर्चेत आहेत. ते वांद्र्याचे आमदार आहेत. त्यांच्या मतदारसंघातील लसीकरणाच्या कार्यक्रमावरुन त्यांनी शिवसेनेवर टीका केली होती. मतदारसंघातील लसीकरणाच्या कार्यक्रमाला पक्षीय राजकारणाचा रंग देऊन डावलले जात असल्याचा त्यांचा आरोप होता.