कंत्राटदाराच्या कार्यालयाची शिवसैनिकांकडून तोडफोड
घाटकोपर, ता.५ (बातमीदार) : पवईच्या चांदिवली येथील मारवा पुलाचे बांधकाम गेले तीन वर्ष कासव गतीने सुरू आहे. याविरोधात शिवसेना शिंदे गटाच्या कार्यकर्त्यांनी बुधवार (ता. ५) पुलाचे बांधकाम करणाऱ्या कंत्राटदाराचे कार्यालय व जेसीबी ची तोडफोड केली. शिवसेना शिंदे गटाचे विधानसभा प्रमुख अशोक माटेकर, माजी नगरसेविका अश्विनी माटेकर यांच्या नेतृत्वात हे आंदोलन केले.
पवईहून अंधेरी एमआयडीसी, मरोळकडे जाण्यासाठी हा मारवा पूल जवळचा रस्ता आहे. २०२१ रोजी हा पूल धोकादायक झाल्याने पालिकेने तो बंद करत हा या पूलाची नव्याने उभारण्याचे काम हाती घेतले. या कामाचे ११ कोटीचे कंत्राट ए आर कन्स्ट्रॅक्शन या कंपनील जानेवारी २०२२ देण्यात आले. ३१ डिसेंबर २०२३ या दोन वर्षांच्या कालावधी हा पुल उभा करण्याची मुदत होती. मात्र अद्यापही या पुलाचे काम कासव गतीने सुरू असून पालिकेने पुन्हा मे २०२४ पर्यंत कंत्राटदाराला मुदत वाढून देत तीन कोटींचा निधी ही वाढवून दिला. मात्र या वेळेत ही काम पूर्ण झाले नसल्याने शिंदे गटाच्या कार्यकर्त्यांनी या पुलाजवळ आंदोलन केले. या वेळी पुढील दहा ते पंधरा दिवसांत जर हा पूल नागरिकांसाठी खुला केला नाही तर पालिकेच्या पूल विभागासमोर ठिय्या आंदोलन करण्याचा इशारा या वेळी अशोक माटेकर यांनी दिला आहे.