मुंबई : महाराष्ट्राची राजधानी मुंबईत (mumbai) कोरोना विषाणूचा (coronavirus) कहर सुरूच आहे. सीबीआयच्या मुंबई कार्यालयात शनिवारी कोरोनाचा स्फोट (Corona blast in CBI) झाला. एकूण ६८ कार्यालयीन कर्मचारी कोरोना पॉझिटिव्ह (68 person positive) आढळले आहेत. सीबीआयचे कार्यालय मुंबईतील वांद्रे कुर्ला कॉम्प्लेक्समध्ये आहे.

केंद्रीय एजन्सीच्या अधिकाऱ्याने सांगितले की, कार्यालयात काम करणाऱ्या २३५ लोकांना चाचणी करण्यास सांगितले होते. २३५ पैकी ६८ जणांचा अहवाल पॉझिटिव्ह (68 person positive) आला आहे. कोरोनाबाधितांना होम क्वारंटाईन करण्यात आले आहे. मुंबईत कोरोना व्हायरसच्या प्रकरणांमध्ये झपाट्याने वाढ झाली आहे.

शुक्रवारी महाराष्ट्रात ४०,९२५ लोकांची कोरोना विषाणूची प्रकरणे समोर आली आहेत. नवीन प्रकरणे समोर आल्याने राज्यात आतापर्यंत एकूण ६८,३४,२२२ लोकांना कोरोनाची लागण झाल्याची पुष्टी झाली आहे. तर एकूण १,४१,६१४ लोकांचा या साथीमुळे मृत्यू झाला आहे.

४०९ बाधित पोलिसांवर उपचार सुरू

शुक्रवारी एकाच दिवसात मुंबई पोलिसांच्या किमान ९३ कर्मचाऱ्यांना कोरोनाची (coronavirus) लागण झाल्याचे आढळून आले होते. यामुळे मुंबई पोलिस विभागातील संक्रमितांची संख्या ९,६५७ वर पोहोचली आहे. तसेच १२३ जवानांनी जीव गमावला आहे. सध्या ४०९ बाधित पोलिसांवर उपचार सुरू आहेत.