कल्याण :  डोंबिवलीतील नवापाडा येथे राहणाऱ्या (वय 38) या कोरोना बाधित रुग्णाने आज आत्महत्या केली. 17 जुलै रोजी कल्याण-डोंबिवली पालिकेने या रुग्णाला भिवंडी रस्त्यावरील 'टाटा आमंत्रा' येथे विलगीकरण कक्षात दाखल केले होते. आज रुग्णास अधिक उपचारासाठी हॉस्पिटलमध्ये दाखल करण्याची आवश्यकता असल्याने त्यांना खाली उतरवण्यात येत असतानाच त्यांनी पाचव्या मजल्यावरुन उडी मारून आत्महत्या केली.

कल्याण-डोंबिवलीतील हॉटस्पॉटमध्ये 31 जुलैपर्यंत निर्बंध कायम; इतर भागात नियम शिथिल

रुग्णाच्या कुटूंबातील एका व्यक्तीला कोरोनाची लागण झाल्यानंतर त्यांची ही तपासणी केली होती. त्यात त्यांना कोरोनाची लागण झाल्याचे निष्पन्न झाल्यावर टाटा आमंत्रा येथे दाखल करण्यात आले होते. मागील दोन दिवस त्यांची प्रकृती ठीक होती. मात्र आज सकाळपासून ते मानसिक तणावाखाली असल्याचे त्यांच्या एका नातेवाइकाने सांगितले. यासंदर्भात पोलिसांकडून अधिक माहिती घेतली जाईल असे पालिका प्रशासनाने स्पष्ट केले आहे मात्र मागील दोन दिवसात या रुग्णाचे वागणे विक्षिप्त असल्याचे तेथील काही कर्मचाऱ्यांनीही सांगितले आहे. मृत रुग्णाला टाटा आमंत्रा येथे नवव्या मजल्यावर दाखल करण्यात आले होते. तेथून त्यांना औषधोपचारांसाठी पाचव्या मजल्यावर आणले असता हा प्रकार घडला असावा असे प्रथमदर्शनी सांगण्यात आले. मेकॅनिकल इंजिनिअरिंगचे शिक्षण घेतलेल्या या रुग्णाच्या पश्चात पत्नी, दोन वर्षाची मुलगी, वडील असा परिवार आहे
------------------------------

Edited by Tushar Sonawane