मुंबई - कोरोना काळात महापालिकेकडून करण्यात आलेल्या खिचडी वितरणात घोटाळा प्रकरणी पोलिसांच्या आर्थिक गुन्हे शाखेने शनिवारी गुन्हा दाखल केला आहे. खासदार संजय राऊत यांचे विश्वासू सुजीत पाटकर यांच्यासह 6 जणांविरोधात गुन्हा दाखल करण्यात आला आहे.

त्यात फसवणूक, फौजदारी विश्वासघात, कट रचणे, आदी कलमांर्गत गुन्हा दाखल करण्यात आला आहे. याप्रकरणी 6.37 कोटी रुपयांचा गैरव्यवहार झाल्याचा आरोप आहे. या पूर्वी आग्रीपाडा पोलीस ठाण्यात याप्रकरणी गुन्हा दाखल करण्यात आला आहे.

याप्रकरणी महापालिका अधिकारी, कर्मचारी व इतर व्यक्तींची आर्थिक गुन्हे शाखेने चौकशी केली होती. कोरोना काळात कामगारांना वाटप करण्यासाठी महापालिकेकडून खिचडी करण्यात आली होती. महापालिकेत करोना काळात 160 कोटींचा खिचडी गैरव्यवहार झाल्याचा आरोप भाजप नेते किरीट सोमय्या यांनी केला होता. त्याप्रकरणी आर्थिक गुन्हे शाखेकडे तक्रार करण्यात आली होती.

सूरज चव्हाणांची चौकशी

खिचडी घोटाळा प्रकरणी शिवसेना ठाकरे गटाचे नेते सुरज चव्हाण यांची यांची 22 ऑगस्ट रोजी आर्थिक गुन्हे शाखेकडून चौकशी करण्यात आली. सूरज चव्हाण आदित्य ठाकरे यांचे निकटवर्तीय मानले जातात. मुंबई महापालिकेतर्फे खिचडी वाटपासाठी कंपन्यांना दिलेल्या कंत्राटांशी संबंधित आर्थिक अनियमिततेबद्दल सूरज चव्हाणांची चौकशी करण्यात आली. यापूर्वी या प्रकरणी ईडीने दिलेल्या माहितीच्या आधारे प्रदान चव्हाण यांची मागील महिन्यात आर्थिक गुन्हे शाखेने 6 तास चौकशी केली होती.

आरोप

कोरोना काळात काही नेत्यांनी स्थलांतरित मजुरांना खिचडी पॅकेट पुरवण्याचे कोट्यवधींचे कंत्राट मुंबई महापालिकेकडून मिळवले. लॉकडाऊन काळात मुंबईतील स्थलांतरित मजुरांना 25 खिचडी पॅकेट पुरवण्यात आले होते. यात 160 कोटींचा खिचडी घोटाळा झाल्याचा आरोप करण्यात येत आहे.

खिचडी पॅकेट पुरवण्याच्या नावाखाली ठाकरे गटाच्या काही नेत्यांनी महापालिकेकडून 8.10 कोटी रुपये मिळवल्याचा आरोप आहे. त्यातील 4 कोटी बोगस कंपन्यांना वळवण्यात आल्याचा आरोप करण्यात येत आहे. तसेच नेत्यांनी बोगस कंपन्या आणि नेत्यांच्या नावावर हा कोट्यवधींचा घोटाळा केल्याचा आरोप आहे. यापूर्वी भाजप नेते किरीट सोमय्या यांनी या घोटाळ्याची माहिती उघड केली होती.