मुंबई, ता.12: छत्रपती शिवाजी महाराज आंतरराष्ट्रीय विमानतळावर 9 आणि 10 एप्रिल या दोन सीमाशुल्क विभागाने केलेल्या कारवाईत कोट्यवधीचे सोने जप्त केले आहे. या कारवाईत 2 परदेशी महिलांसह 3 आरोपी प्रवाशांना अटक करण्यात आली आहे.

रुबिना बानो शेख , मेरी मेला व मायला ओर्डोनेझ अशी अटक करण्यात आलेल्या महिलांची नावे आहेत.यातील शेख ही मुंबईतील मालवणी परिसरातील रहिवासी आहे, तर मेरी व मायला दोघीही फिलिपिन्स देशाच्या नागरिक आहेत. त्यांच्याकडून 3.5 किलो सोने जप्त करण्यात आले आहे.

आंतरराष्ट्रिय बाजारपेठेत सोन्याची किंमत 2 कोटी रुपये एवढी आहे. सीमा शुल्क विभागाच्या अधिकाऱ्यांना या आरोपी महिला रुबिना शेख संदर्भात गुप्त सूचना प्राप्त झाली होती. त्यानुसार आरोपी प्रवासी शेखला मुंबई विमानतळावर विमानातून उतरताच त्यांना रोखण्यात आले.

तसेच तिची तपासणी करण्यात आली. तपासणीत शेखने लपवलेले सोने तपास अधिकाऱ्यांच्या हाती लागले तेव्हा तातडीने विमानतळावरून शेखला अटक करण्यात आली. तिच्या चौकशीत 2 परदेशी महिलांनी शौचालयामध्ये सोन्याची भुकटी लपून ठेवल्याची अधिकाऱ्यांना माहिती मिळाली. हे सोने मेरी व मायला यांनी शेखला दिले होते. त्यानंतर त्यांनी शौचालयात सोने लपवले होते. त्यानंतर सापळा रचून इतर दोन परदेशी महीलाना अटक करण्यात आली.