Crime News: मॉर्निंग वॉक करण्यासाठी घराबाहेर पडलेल्या एका व्यक्तीला पोलिस असल्याचे भासवून दोघांनी गळ्यातील सोन्याची चेन चोरली आहे. या प्रकरणी रबाळे पोलिस ठाण्यात जबरी चोरीचा गुन्हा दाखल आहे.

ऐरोली सेक्टर-२ मध्ये राहणारे अनिल मोकाशी (५८) सकाळी ५ वाजता पटणी रोड येथे मॉर्निंग वॉकसाठी जातात. सेक्टर-२० मधून जात असताना एका लुटारूने त्यांना रस्त्यात अडवले होते. तसेच पोलिस बोलावत असल्याचे सांगून या रस्त्यावर हत्या झाली असताना रस्त्यावर कसे फिरता, असे बोलून मोकाशी यांना दमात घेण्याचा प्रयत्न केला.

यावर मोकाशी यांनी या रस्त्यावर मॉर्निंग वॉकसाठी येत असल्याचे सांगितले. यावेळी दुसऱ्याने मोकाशी यांची कॉलर पकडून त्याच्या गळ्यातील सोन्याची चेन काढून घेतली. या प्रकारामुळे घाबरलेल्या मोकाशी यांनी तात्काळ घर गाठले होते.