Crime News: फरार गुन्हेगारांना पकडण्यासाठी पोलिसांना अनेक वेळा विविध शक्कल लढवाव्या लागतात. कधी वेष बदलून राहावे लागते; तर कधी चोराचेच सोंग घेऊन त्यांना रंगेहाथ पकडावे लागते. कधी कधी बनावट ग्राहक बनूनही कारवाई केली जाते. मानपाडा पोलिसांनीही अशीच कामगिरी केली असून घरफोडी करणाऱ्या चोराला पकडण्यासाठी त्यांनी चक्क उत्तर प्रदेशमधील वीटभट्टीवर मजूर म्हणून काम केले.

पोलिसांच्या या कामगिरीचे सर्वत्र कौतुक होत असून चोराकडून २२ गुन्ह्यांची उकल करण्यात आली आहे. राजेश राजभर असे आरोपीचे नाव असून त्याच्याकडून २१ लाख २६ हजारांचे सोन्याचे दागिने पोलिसांनी हस्तगत केले आहेत.

डोंबिवली पूर्वेतील देसलेपाडा येथे राहणारे ओमकार भाटकर यांच्या घरी ऑगस्ट महिन्यात घरफोडी झाली होती. रक्षाबंधनासाठी ते गावी गेले असता दिवसाढवळ्या चोराने बंद घराचा कडी-कोयंडा तोडून घरातील मौल्यवान दागिने लंपास केले होते. याप्रकरणी मानपाडा पोलिस ठाण्यात गुन्हा दाखल करण्यात आला होता. गुन्हा दाखल होताच पोलिसांनी शोध सुरू केला.

वरिष्ठ पोलिस निरीक्षक अशोक होनमाने यांच्या मार्गदर्शनाखाली सहायक पोलिस निरीक्षक सुनील तारमाळे, अविनाश वणवे यांच्या पथकाने तपास सुरू केला. राजभर हा सीसीटीव्हीमध्ये कैद झाला होता. दुसरीकडे नवी मुंबई, पनवेल येथील पोलिसांचे पथकदेखील राजभरचा शोध घेत होते. गुन्हे शाखेने केलेल्या तपासानुसार राजभर हा अंबरनाथ येथे राहत असून तो मूळचा उत्तर प्रदेशचा असल्याची माहिती पोलिसांना मिळाली. आझमगढ जिल्ह्यात तो आपले अस्तित्व लपवून राहत होता.

मानपाडा पोलिसांनी एक पथक तयार करत ते उत्तर प्रदेश येथे पाठवले. पोलिसांनी राजेशच्या येण्या-जाण्याच्या रोजच्या मार्गाची माहिती काढली. त्या मार्गावर असलेल्या वीटभट्टीवर पोलिसांनी थांबून तेथे पेहराव बदलून ते काम करत होते.

दोन ते तीन दिवस पाळत ठेवल्यानंतर ३० ऑक्टोबर रोजी राजभर हा दुचाकीवरून येत असताना पत्ता विचारण्याच्या बहाण्याने त्याला थांबवून त्यास ताब्यात घेतले. त्याच्याकडे चौकशी केली असता त्याने सात गुन्ह्यांची कबुली दिली. त्याच्याकडून पोलिसांनी २१ लाख २६ हजार रुपये किमतीचे ३४३ ग्रॅम वजनाचे सोन्याचे दागिने हस्तगत केले आहेत.

पोलिसांनी राजेश राजभर याच्याकडे अधिक चौकशी केली असता त्याच्यावर मानपाडा, पनवेल, अर्नाळा, महात्मा फुले, अंबरनाथ, कोळसेवाडी, बदलापूर, शिळ-डायघर, विष्णूनगर, कल्याण तालुका, शिवाजीनगर, अंबरनाथ आदी पोलिस ठाण्यांत तब्बल २२ गुन्हे नोंद असून या गुन्ह्यांची उकल करण्यात मानपाडा पोलिसांना यश आले आहे.

आरोपीने चोरी करून गावी आलिशान घरदेखील बांधले आहे. मुंबई, उपनगरात तो काही दिवस मुक्काम ठोकून बंद घरे फोडून चोरी करून गावी पुन्हा निघून जात असे, अशी माहिती सहायक पोलिस आयुक्त सुनील कुराडे यांनी दिली.