मुंबई : दादर रेल्वे स्थानकाच्या (dadar railway station) पूर्वेकडे 70 वर्षे जुने हनुमान मंदिराला (hanuman temple) हटविण्याची नोटीस (notice) मध्य रेल्वेने (central railway) हनुमान मंदिर प्रशासनाला दिली आहे. दादर स्थानकावर विकासात्मक कामे (development) करण्यासाठी बेकायदेशीर असलेले मंदिर तत्काळ हटवण्याची आवश्यकता आहे. 7 दिवसांच्या आत हे मंदिर हटविण्यात यावे, अशी नोटिस मध्य रेल्वेने मंदिर प्रशासनाला दिली आहे. रेल्वे प्रशासन भावना शून्य होऊन (feeling less railway authorities) नोटीस बजावत असल्याचे मंदिर प्रशासनाचे म्हणणे आहे.

मध्य रेल्वेवरील गर्दीच्या स्थानकांपैकी दादर स्थानक एक आहे. मध्य आणि पश्चिम मार्ग दादर स्थानकाला जोडले गेले आहे. तसेच, अनेक मेल, एक्स्प्रेसला दादर येथे थांबा दिला जातो. मुंबई-पुणे जाणाऱ्या खासगी बस आणि राज्य परिवहनच्या गाड्यांचा अधिकृत थांबा स्थानकापासून जवळ आहे. अनेक सरकारी कार्यालये, खासगी कार्यालय, शाळा, काॅलेज, मैदाने या भागात असल्याने येथे मोठ्या प्रमाणात रहदारी असते. त्यामुळे रेल्वे मंत्रालयाच्या सूचनेनुसार भारतीय रेल्वे स्टेशन विकास निगम (आयआरएडीसी) यांच्याद्वारे स्थानकाचे नुतनीकरण करण्यात येणार आहे. मात्र, स्थानकात बदल करण्यासाठी स्थानकाच्या पूर्वेकडील पादचारी पुलाशेजारी असलेल्या हनुमान मंदिराला रेल्वे प्रशासनाने नोटीस पाठवली आहे.

मध्य रेल्वेच्या कर्मचाऱ्यांनी केलेल्या पाहणीनंतर हनुमान मंदिर हे रेल्वेच्या जागेवर बेकायदेशीर बांधण्यात आले आहे असल्याचे दिसून आले आहे. या मंदिरामुळे प्रवाशांच्या वर्दळीसाठी मोठ्या प्रमाणात अडथळे निर्माण होत आहेत. तसेच रेल्वे स्थानकाशेजारी विकासकामे करण्यासाठी मंदिरामुळे अडथळे येत आहे. रेल्वेने याआधीही हे मंदिर बेकायदेशीर असल्याचे सांगितले होते. आता ही नोटीस मिळाल्यानंतर पुढील 7 दिवसांत या मंदिराची जागा रेल्वेच्या ताब्यात देण्यात यावी. अन्यथा, रेल्वे प्रशासन बळाचा वापर करून मंदिर हटविण्यात येणार असल्याची माहिती मिळत आहे. मात्र, रेल्वेच्या या नोटीसवरून वाद पेटणार असल्याचे चिन्ह दिसून येत आहे.

हनुमान मंदिराशी भक्तांच्या भावना जोडल्या आहेत. 70 वर्षांपासून हे मंदिर उभे आहे. मात्र, विकासाच्या नावावर मंदिर तोडणे कितपत योग्य आहे, असा प्रश्न पडतो. रेल्वे प्रशासन याठिकाणी आलिशान माॅल्स, दुकाने उभे करणार आहे. त्यामुळे या सुविधेचा फायदा स्थानिकांसाठी किंवा प्रवाशांसाठी होणार नसून तो मोठमोठे उद्योजक, रेल्वे प्रशासनाला होणार आहे. या मंदिरात फक्त स्थानिक रहिवासी येत नसून टाटा, केईएम, वाडिया, अल्पोला या रुग्णालयात दाखल झालेल्या रुग्णांचे नातेवाईक, शाळा, कॉलेजमधील विद्यार्थी परिक्षेच्या वेळी दर्शन घेण्यासाठी येतात. त्यामुळे प्रत्येकाच्या भावना या मंदिराशी जोडल्या गेल्या आहेत. मात्र, रेल्वे प्रशासन भावना शून्य होऊन नोटीस बजावत आहे.

- प्रकाश कारखानीस, विश्वस्त, हनुमान मंदिर, दादर